Марий Эл Колумбын лӱмгечыжым пайремла (ФОТО, ВИДЕО)

«Пиал верч колышым тӱня ок мондо, Илаш пиал верч эшеат асу!»

Тыге каласен Валентин Колумб. Теҥгече Йошкар-Оласе Мер-политик рӱдерыште Валентин Колумбын шочмыжлан 75 ий темме лӱмеш пӧлеклалтше Тӱнямбал поэзий пайрем кышкарыште «Кодшо курымын у шӱлышыжӧ – у тукымлан» шанче-практик конференций эртыш.

Тунамак тиде поэзий пайрем пайремлын почылто. Марий, чуваш, коми йылмыла дене мутмастарын почеламутшо-влак йоҥгышт. Тудын нерген Чуваш ден Коми республикыла, Эстоний гыч толшо уна-влак да кундемыштына илыше калык кугешнен ойлышт.

Тиде кечынак В.Колумбын илыме пӧрт пырдыжеш (Йошкар-Ола, Йошкар Армий урем, 74-ше №-ан пӧрт) шарнымаш оҥам пижыктеныт. А таче поэтын шочмо Морко районыштыжо (Волаксола ялыште) кугу пайрем умбакыже шуйна. Тушто Колумб лудмаш гӱжла, тыгак ончер-влакым ужаш лиеш. Кастене этнодискотекыште чон канен тавалташ йӧн уло.

Уке мемнан коклаште пагалыме марий да тӱнямбалнат кӱкшын аклалтше сылнымут мастарна, но келге поэзийже – курым-курымлан пеленна, да шкежат мемнан коклаште ила. Санденак «Толза муро памашем воктек!» ойжо шулдыранак кодеш, «Эре чоҥешташ, чоҥешташ!» девизше ончыко ӱжеш.
«Марий Эл ТВ»-н видеосюжетше:

Эльвира Куклина

И.Речкинын фотожо-влак

Налмывер: Кугарня