19 пеледышыште Йошкар-Олаште марий калыкын эн вучымо пайремже — Пеледыш пайрем эрта. Вет шошо ага пашам пытарымек ты пайрем кечын калык уло кумылын кана, мурен-куштен чонжым лыпландара.
Кажне ийын Пеледыш пайрем иктаж-могай ойыртем дене эрта. Мутлан, тений Марий Эл Республиклан 90 ий темеш, сандене тиде тат Пеледыш пайремым эртарымаште шотыш налалтеш.
Районла гыч толшо калык, тӱрлӧ мер ушем-влак, мотор марий вургемым чиен, урем дене Ленин лӱмеш площадьыш ошкылыт. Туштыжо виктем вуйлатыше-влак толшо калыкым саламлат. Погынышо-влак Марий Эл кундемын вияҥ толмо корныжым театр представлений гыч эскера. Тудо акрет годсо, 20-30 ийла, сар жапым да кызытсе тыныс илышым авалта.
Умбакыже чыланат колонна дене Йошкар-Оласе тӱҥ каныме паркышке тарванат. Паркыште улшо «Илыш рӱдӧ» марий сымыктыш композиций ончылно калык семӱзгар почеш марла мурен-куштат.
Тиде пайрем кечын фольклор, спорт, йоча-влаклан модыш площадка-влак пашам ышташ тÿҥалыт. У Роҥго кундемыште кокымшо Марий самырыктукым слетыш погынышо самырык еҥ-влак Пеледыш пайремыш чумырген толыт.
Пайрем М.Шкетан площадьыште Марий танцпол дене мучашлалтеш.
Марий тӱвыра рӱдер
Налмывер: Тÿвыра министерстве
MariUver 
— «19 пеледышыште» огыл, а 19-ше пеледыш тылзыште
— «Районла гыч» кундемла гыч лиеш
Тылзын лумжö пеледыш, садлан пеледышыште, ме вет июньышто ман возена, молан пеледышыште ок лий?
Кундем мутын марий йылмыште пеш шуко значенийже: Пошкырт кудндем = Башкортостан Республик, Морко кундем Марий Эл кышкарыште = Морко район лийын кертеш, Унчо кундем = Унчо ял лишне вер-шöр, Киров кундем = Киров область…
Мыйын шонымаште вигак умылаш йöсö, кунам пеледышыште манын возена, «в цветке» умылаш лиеш. Икманаш, калык эше тунемын шуын огыл.
Туге, «район» мутлан шуко шомак келшен толеш: вер-шöр, кундем, вел. Тыгак кундем мутым вес семын умылаш лиеш.
Цифр деч вара улмыжо тылзе нерген ойла, адакшым курсорым мут ÿмбак шындет гын мом ончыктымыжым ужаш лиеш.
Пеледыш тылзын 19-ше кечыныште. Мыланна руш-влак семын возаш огеш кӱл. Мемнан шке мут черет уло.
чын — кечынЖЕ. Йылме эре кÿчыкем толеш, шонем «пеледыш тылзын 19-ше кечынже» да «19-ше пеледышыште» але эше тошо марий формым, южо диалектлаште сайлалт кодшо, «19-ше пеледышын» ик семын кучылташ лиеш дыр. Тылзе лÿм марий йылмыште изи йÿкапале дене возалтеш, те гын англичан йылмыште семын кугу дене середа.
Тыге гын, изи дене сераш тӱҥална 🙂