2009 ий Самырыктукымын идалыкшылан пӧлеклалтын. Тудо эртен гынат, ӱдыр-рвезе-влакым ӧрдыжеш кодымо огыл. Тений кушкын толшо тукымлан пӧлеклалтше ятыр мероприятийым эртараш палемдыме. Тидын нерген Россий Федерацийын финн-угор калык-влакын самырыктукымыштын ассоциацийжын (РФ МАФУН-ын) Марий Элысе пӧлкажым вуйлатыше, Марий Эл радион чолга вӱдышыжӧ Наташа Пушкина радамын каласкалыш.
РФ МАФУН-ын икымше погынымашыже 2009 ий 4 ноябрьыште Москошто эртен. Ты погынышто ассоциацийын уставшым пеҥгыдемденыт. РФ МАФУН-ын активышкыже индеш еҥым сайлыме. Вуйлатышылан Удмуртий гыч Татьяна Ишматовам, алмаштышыжлан Н.Пушкинам шогалтыме. РФ МАФУН шанче-туныктеж*, илышкыл*, тÿвыра, экономикe, спорт, тазалык, демократий, экологий, регион кокласе да тӱнямбал кыл, увер-аналитике* паша-влакым виктара, тышке самырык тукымым уша.
РФ МАФУН-ын Марий Элысе пӧлкашкыже ӧрдыж кундемлаште илыше марий ӱдыр-рвезе-влакым пуртымо. Мутлан, Татарстан, Одо республикыла, Киров область, Хант-Манси автоном округ гыч. Икманаш, 2009 ий июль-ышто марий самырыктукымын I Пÿтынь Российысе слётышкыжо чумыргышо чолга ӱдыр-рвезе-влак дене кылым умбакыже шуйымо.
А теве мурызо Александр Речкин Нижневартовскышто Марий ушемым почаш шона, молан манаш гын марий-влакын ушемыштым тыште официальнын регистрироватлыме огыл. Тушко Н.Пушкина ден Э.Александров тений январь тӱҥалтыште миен коштыныт, тусо марий-влак дене погынымашым эртареныт, тӱҥалме пашаштлан полышым пуаш сӧреныт.
— Пашана моткоч шуко. Эн ончыч Хант-Манси автономный округ гыч марий рвезе Вячеслав Килеевын «Марий Википедий» пашажым умбаке шуена, Интернетыш лукнена. Ноябрьыште марий тӱвыра рӱдер дене пырля марий КВН-ым эртарена. Тышке Марий Элыште илыше ӱдыр-рвезе-влакым веле огыл, тыгак Российын моло регионыштыжо илыше марий самырык тукымым ушена. Тыгай шотан КВН-ым марий самырыктукымын I Пÿтынь Российысе слётыштыжо ончымо. 26-29 апрельыште Талешке кечылан пӧлеклалтше Талешке сорта эрта. Меат ты мероприятийыш ушнена. Этнокультур форумым тений эртараш палемдыме, тышкат ӱдыр-рвезе-влакым ушена. Идалык мучаште марий У ийым ышташ палемдыме. Йӱштӧ кугыза, Лумӱдыр, ӱдыр-рвезе-влак, издерыш шинчын, яллашке лектын, йоча-влаклан пӧлекым пуэдаш тӱҥалыт. Мультфильм-влакымат марий йылмыш кусарена, http://www.mari-el.name сайтыште марлаҥдыме «Смешарики» мультфильмым ончаш лиеш. Умбакыже тудым социал проект семын виктарена. Кеҥежым марий самырыктукымын II Пÿтынь Российысе слётшо эрта, — каласкалыш Н.Пушкина.
Л.БЛИНОВА
Д.Речкинын фотожо
Налмывер: «Марий Эл» газет
*шанче-туныктеж — научно-образовательный; илышкыл — социальный; увер-аналитике — информационно-аналитический; самырыктукым — молодежь
MariUver 
>марий рвезе Вячеслав Килеевын «Марий Википедий» пашажым
Википедий — тÿшка паша, негызым тудлан финн Арто Мойсио да Австрий гыч программист Джереми Мос Брадлей пыштеныт, тыгак вес марий-влак шуко возеныт, теменыт. Килеев вара гына ушнен да чыла радамлен шотыш конден регистрироватлен.
Таче «регистрироватлыме» эн шергын аклалтеш шол, да чÿчкудын прессашке лекме кÿлеш, тунам веле тый «Ыштыше» да «чолга» лият. Молыжо — кеч тÿнчыгыза тыршымашыштыда.
Ай-ай-ай, мом каласеда..
А википедиыйын интерфейсым марий йылмыш кусараш вет тоже кӱлеш! Ни Арто Мойсио, ни Джереми Брадлей интерфейсын(тӱжвал сынын) эсогыл ик каласымашым(сообщенийжым) кусарен огытыл. А вет чылажге 500 наре каласымашым кусараш кӱлеш ыле. А южо каласымаш-влак 4(ныл) абзац гыч кугырак улмаш.
Регистрацийым эрташ — тиде йӧсӧ огыл шонеда?
Ончыза тунам:
http://meta.wikimedia.org/wiki/Language_committee/Status/wp/mrj
Тиде лӱмерыште критерий-влак Курык марий википедиыйм регистрироватьляш. Ончыза мыняр шуко тушто критерий-влак. Тиде критерий-влак кажне йылмылан икгай улыт.
А могай регистрацийым эртыже википедий да регистрациым эртыдыме википедий коклаште ойыртемже?
Тиде лаштыкыште http://www.wikipedia.org/ ончыза.
Олык марий википедийлан кылвер уло(тудо регистрацийым эртен), а курык марий википедийлан кылвер уке улмаш(тудо регистрацийым эше эртен огыл).
Але эше тидым ончалза. Чавайн нерген, мутлан, лаштыкым ончыза руш википедийыште:
http://ru.wikipedia.org/wiki/Чавайн,_Сергей_Григорьевич
Тушто ӱлнӧ шолаште «На других языках» ужаш уло. Олык Марий Википедийыш кылвер(ссылке) уло, а курык марий кылвер уке.(Керек тыгай лаштыкше уло http://incubator.wikimedia.org/wiki/Wp/mrj/Чавайн_Сергей_Григорьевич)
Тугеже регистрацийдыме википедий — тиде википедий эше огыл, тиде инкубатор гына. Тугеже рагистраций эртыме шотышто пашам вурсаш да шӱктараш огеш лий.
Кӧ тидым таваланаш шона гын, кайза курык марий википедиыйм регистрироватьляш, а мый варажым ончем, могай жап дене тый тиде пашам шуйнет.
ПешСай, Марий Википедийым почмаште нигö тыйын надыредым иземдаш ок шоно. Но Марий Эл ТВ-н видеосюжетше-влак почеш пуйто тый гына шонен луктынат да ыштенат, но вет тыге огыл. Весе-влакат ыштеныт да пеш шуко ыштеныт, молан нуным ни тый, ни Марий Эл ТВ огыдат ушештаре? 500 утла статьям тый вет шкетын возен отыл, весе-влакат ПЕШ ШУКО ыштеныт. Садлан иктаж-мом аклыме годым объективный лийман да ит лÿд вес еҥ-влакым ушештарет гын тый шкеже ÿмылеш от код. Но вес еҥ-влак тыйым шотан (порядочный) еҥлан шотлаш тÿҥалыт.