Валентин Колумб лӱмеш рӱдер-тоштерым мер пашаеҥ, литературовед Владимир Козлов 12 ий ончычак ыштен ыле. Тиде пагытыште рӱдер-тоштерлан ятыр верым вашталташ логалын.
Тыгутлаште тудын погыжо эшеат шукемын. А чыла тидым калыкат ужшаш, историйым, кумдан палыме поэт дене кылдалтше кӱлешан материалым шылтен, пуракым погыктен кийыкташ нимолан.
Садланак марий амалкалыше Вячеслав Воронцов («Плёс» фирмын озаже) тоштерлан верым Йошкар-Оласе Подольский курсант-влак уремын визымше номеран пӧртыштыжӧ ойырен. Тудо ынде Валентин Колумб лӱмеш финн-угор калык-влакын историй да сылнымут тоштерже лӱмым нумалеш.
Тоштерым 17 ноябрьыште почыныт. Тушко писатель, шымлызе, журналист, самырык-влакын мер организацийлашт гыч ӱдыр-рвезе-шамыч погыненыт ыле. Тыгай еҥ-влак тиде верыш ончыкшымат чумыргаш тӱҥалыт манын палемдышт, вет тоштерыште сылнымут кас-влакымат, тӱрлӧ вашлиймашымат эртараш шонат.
Эльвира Куклина
Налмывер: «Кугарня» жаплышташ
Фотосÿретыште: Валентин Колумб лӱмеш рӱдер-тоштерым вуйлатыше Владимир Козлов Эстонийыште, Тарту университетыште кутыра, шыже 2008 ий.
MariUver 