Марий Кугыжаныш Погынын депутатыш кандидат В.П.Воронцовын шомакше

Вячеслав ВоронцовТений 11 октябрьыште республикыштына Визымше созыв Кугыжаныш Погынын да верысе самоуправленийын органлашкышт депутат-влакым сайлымаш эрташ тÿҥалеш. Марий Элысе Кугыжаныш Погыныш 52 депутатым сайлаш тÿҥалына. Тышечын пелыже тÿрлö партийна гоч эртат гын, вес пелыже ик мандатан округла гыч сайлалташ тÿҥалыт.

Кугыжаныш кучемын законодательный органышкыже сайлалтше депутат-влак республикына сайын вияҥже, ончыко ÿшанле ошкылым ыштыже манын, закон-влакым луктыт, ончыкылыклан тÿрлö программа-влакым пееҥгыдемдат. Тыгодым иктым каласен коден омак керт.Таче саде 52 депутат гыч марийже пеш шагалын улына.Тыге ынже лий манын, ме, марий-влак, уло вийнам, акылнам, моштымынам пыштышаш да кучылтшаш улына. Вет марий калыкнан кÿшыл органыштыже марий-влак огыт лий гын, тиде шот мо? Вет марийым марияк веле умылен кертеш! Марий мландыжат мемнаныс, тыште мемнан кугезына-влак иленыт, тыште ме шочынна, тыште ме рудö калык улына, садлан моло калык ончылно ме ответственный улына!

Мый шкеже марий калыклан шагал огыл ыштенам манам гын, нимынярат овартен ом ойло, тидын шотышто мыйым нигоат титаклен ок керт.Садлан ончыкыжымат виемат, оксамат, моштымашемат чаманыде тыршаш тÿҥалам. А мыйын гай марийже эшеат шукырак лиеш гын, тидыже сай веле.Садлан ончыл шонымашан тале марий-влаклан жапыштыже полшаш кÿлеш манын шонем.

Таче агитатор-влак кÿшыл органыш лекташлан келшыше тиде але вес кандидатлан чыла административный йöным кучылтыт.Законымат пудырташ тöчат, калыкымат ондалат. Пуйто кÿлеш еҥым огыда сайле гын, ялышкыда корным огына пыште, газ ок пурталт… Но вет тидыже чылажат Федеральный программе дене ышталтеш, тиде чылажат Федеральный планыште уло.Эшеат чынжым каласаш гын, чыла тиде паша налог окса кÿшеш ышталтеш. А налогшым ме шкак тÿлена огыл мо? Пытартыш жапыште газым пуртымо да корным чоҥымо нерген шуко ойлат. Мыланна келшыше, йöнлö депутатым сайледа гын, вашке гына канде тулым кажне пöртышкö пуртена, корнымат ачален-чоҥен пуэна маныт. Чынжым каласаш гын, пошкудо республиклаште (Татарстаныште, Чувашийыште) газ дене шукертак чылан гаяк, 100 процент наре калык манына, пайдалана. Корнат чыла гаяк изи ялыште уло. А мемнан дене тиде йодыш эше пÿсын шога. Адакшым тугакшат моткоч нелын илыше ял калык газым пуртымылан 50-60 тÿжем(!) теҥге наре оксам пышта, чыла коммуникацийлан тÿла. Тыге ял калыкын, пытартыш оксам пыштен, суртышкышт газым пуртымек, властьыште улшыжо «ме пуртышна», «ме чоҥышна» манын вожылде моктана.

Калыкыште маныт, олыкым ик пеледыш ок сылнештаре.Тудо турлö-турлö пеледыш кушмо дене гына сылнештеш. Республикыштынат тыгак: моло турлö калык дене пырля илыше тÿп марий калыкшат сайынрак илаш тÿҥалеш гын веле ончыклыкна сай могырыш вашталтеш. А тидыже мемнан деч шога! Чыла тидыже шкенан кидыште! Садлан сайлымаш кечын, марий-влак, келгынрак шоналташ да чын йÿклаш йодам.

Айста икоян лийына! Тунам гына мемнам пагалаш да аклаш тÿҥалыт!

Визымше созыв
Кугыжаныш Погыныш депутатлан кандидат
Вячеслав Петрович Воронцов

3 комментария

Filed under Артикль-влак

3 responses to “Марий Кугыжаныш Погынын депутатыш кандидат В.П.Воронцовын шомакше

  1. Петан

    Чын мут! Шем саманым 11 октябрьеш пытарен кертына: «Пÿтынь калык пуалеш гын — кугу мардеж лектеш, чыла осалым наҥгая!» Айста пуалына, изи лышташыште чыным коден сайлена!

  2. Петан

    Пу*тынь калык ыш пуал: икте пуале, весе коран*е, кумшо пушарыш…

  3. мартын

    мый пушарен омыл

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google photo

Для комментария используется ваша учётная запись Google. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s