Июль тылзын икымше пелыштыже Эстонийыште марий-влак нерген кок чынилыш* фильмым ончыктымо.
6 июльышто ETV эстон телеканал дене Эстонийыште илыше марий режиссер Алексей Алексеевын «Мыры айо» фильмжым ончыкташ шонымо нерген мемнан сайтна рушла возен ыле.
Фильмым автор 2004 ийыште эртыше «Мыры айо» негызеш возен. Тунамак йӱк студийыште фильмлан дикторын текстшым курык марла Финляндий гыч марий кусарыше Валерий Аликов келыштарен. Фильмым эстон, финн, англичан йылмылаш кусарыме.
Режиссер А.Алексеев шукерте огыл эше ик кугу пашам мучашлен. Тиде гана фильмым «Кӱсö памаш» манын лӱмден да урал марий-влаклан пöлеклен. Тӱҥ верыште — Свердловск областьысе Красноуфим район, Кугу Тäврäсе мастар калык, тусо йӱла ойыртем, шнуй вер. Марла текстым диктор семын Василий Петров лудеш.
А.Алексеевын «Кӱсö памаш» фильмжым 8 июльышто Эстонийысе Пярну олаште эртыше кинофестивальыште ончыктымо. Тыге ик арняште марий режиссерын иканаште кок пашаже кугу аудиторийыш лектын. Землякнам шокшын саламлена.
Светлана Пехметован «Марий Эл» газетыште возымыж негызеш
MariUver
*чынилыш — документальный
MariUver 