Васиий Якимов сериалыште модеш

JakimovМарий эстрадын ик мурызыжо, Василий Якимов дене шукертсек вашлийын огынал ыле. Ондак тудым концертлаште чӱчкыдын ужынна гын, пытартыш жапыште тудо сценыш шуэнрак лектеш. Ты гана талантан рвезым кычалаш шонымаш шочо, да «Кугарня» газетын эртарыме «Ылыжеш пӱртӱсшат» концертыш ӱжна.

Вася тугаяк весела шинчаончалтышан, шыргыжал мутланыше, тыматле кумылан кодын. Шижалтеш: модым шекланен ила, сценышке чиен лекме вургемже ӧрыктарыше стилян. Лӱмжӧ торашке йоҥгалтше, вет икымше ошкылым ыштыше нӧргӧ койышым тудо шукертак ончылтен.

Медведево районысо Юбилейный посёлкышто шочшо (1984 ий 18 ноябрь) рвезе сылнысем дек моткоч шӱман кушкын. Аваже эргыжым Йошкар-Олашке, 1-ше №-ан национальный президент интернат-школыш, конден. Тыге сылнылык тӱняшке омса почылтын. Василийын парняже лывырге, йӧратыме семӱзгаржым, баяным, шокталтен колта, пуйто уло тӱня ылыжеш. Ужына рвезым Марий Эл Республикын сулло артисткыже, мурызо Татьяна Денисован вуйлатыме «Яндар» группыштат. Вашкыл кӱрылтын огыл, концертым эртарыме годым эре калык чоным куандарат.

«Кузерак таче Вася Якимов ила?» — манын йодмемлан шкеже тыгерак вашештыш:

«Озаҥ оласе тӱвыра университетын 5-ше курсыштыжо тунемам, диплом пашам возем. Ик куан уверем уло: «Пирамида» ООО «Максимус»  студийын сниматлыме «Пушнина» сериалыштыже модаш пиал шыргыжалын.   Сериалыште сӱан кайыме тат ончыкталтеш. «Млада» ансамбльын музыкантше-влак уна-шамычым куандарат, йодмо мурыштым шоктат. Тыгерак мый тушто баян дене импровизаций-влакым ыштылам».

Сӱаным войзымо  сценка 12 шагат шуйнен. Ты фильмын режиссёржо — Вячеслав Судов. Кумдан палыме актёр-влак Эмилия Спивак, Кирилл Сафонов, Тамара Акулова, Дмитрий Муляр да молат модыт. Кажнышт дене марий рвезе лишке палыме лийын. А такшым гын Василий Якимовын йолташыже-влак  тӱня мучкак улыт. Кок ий ончыч  тудо Францийыш миен улмаш. Тушто шоктымыжым ужыныт, тыге сериалышкат логалын. Мыйын шонымаште, талантан еҥ кеч-куштат корным муэш. Келгын шергалаш гын, марий калыкын шочшыжо-влак моло вереат пагалымашым сулат.

Василий Якимов аважым, Галина Ивановнам, моткоч йӧрата. Лӱмынак мурымат возен. Поэтесса Эльвира Куклинан шомакшылан серыме «Авамлан» муро тудлан эргыж деч эн шергакан пӧлек лийын.

Самырык рвезе эше ешан лияш огеш вашке. «Ондак йолымбак пеҥгыдын шогалман, сай паша веран лийман», — манеш. Але чылажат ончылно.

Тек муро аланыште йӱкет яндар да артист койышет тыгаяк йытыра кодыт.

Татьяна Пчёлкина

Налмывер: «Кугарня» жаплышташ

5 комментариев

Filed under Артикль-влак

5 responses to “Васиий Якимов сериалыште модеш

  1. Ончышо

    Ончемат марий-влак чылан сериаллаште сниматлалташ пижыныт. Пеш сай!

  2. Вачис

    мустафа (клоун) олмеш кучылтыт

  3. Шыде

    >мустафа (клоун) олмеш кучылтыт

    Вара ынде Мустафам модшо Йыван Кырла марий улеш да тыят марий улмет деч вожылат мо? Ой мискинь, тугеже Мустафам клоунлан шотлышо еҥ-влаклан марий омыл ман, тыге ласканрак илет.

  4. Вачис

    шыдын нимат акылже уке

  5. Колой

    Туге, Вачис.

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s