Татар ӱдыр марла мура (ВИДЕО)

sanija«Чарша шойыч» страницын кодшо номерыштыже татар ӱдыр Сания Рамайын марла мураш тӱҥалмыж нерген возенна ыле. А таче тудын дене тендам, пагалыме лудшына-влак, лишкырак палымым ыштена. Кö тудо тыгай, марла мураш тӱҥалаш мо таратен — рашемдаш тыршена.

Сания Киров область, Лебяж районышто шочын. Но изи улмыж годымак ешыже Параньга поселкыш илаш куснен. Кызыт тудо шке ешыж дене (пелашыже да икшывыже-влак дене) Йошкар-Олаште ила.

— Сания, марий мурым мураш тӱҥалаш шонымаш кузе шочын? Тиде молан кӱлын? Пытартыш жапыште марий концерт-влак кугу йодмаш дене пайдаланат да тушко тыйымат ӱжышт манме шонымашет лийын огыл?

— Чыным ойлаш гын, тидат уло. Но мый марий калыкым моткоч йöратем. Эше вич ий ончыч татар тӱвыра рӱдерым вуйлатыме жапыштак ятыр мурызо да коллектив дене пашам пырля ыштенна. Кызыт Марий кугыжаныш филармонийыште администраторлан тыршем. Икымше кӱшыл образованием вуйлатыме паша дене кылдалтын — МарГТУ-со «управлений да права» факультетым пытаренам. А кокымшыж дене режиссер лиям — Казаньыште культура да искусство университетыште пытартыш курсышто тунемам. Шукерте огыл культура да искусство колледжыште тиде предметымак вӱдаш тӱҥалынам. Кеч шкежат эше ты колледжыштак эстрада отделенийыште кумшо курсышто шинчымашым погем. Марий мурызо-влак коклаште сай йолташем ятыр. Тидат марла мураш тӱҥалаш амалым мыняр-гынат ыштен. Такшат мылам марий калыкын йӱлаже, культурыжо келша, адакшым колледжыште тӱҥалтыш курсышто мыланна марий йылмым туныктеныт, да тудым изиш палем. Чыным ойлаш гын, тиде мыйын йоҥгалтарыме кокымшо мурем. Икымшыже «Уржа пасу» маналтын. Тудым Валерий Дмитриевич Кульшетов возен. А «У ий мурым» мый У ий вашеш марий калыклан пöлекым ыштыме семын мураш тӱҥалынам. Кеч семжым шкеже интернациональныйлан шотлем.

— Молан? Тудын авторжо уке мо?

— Уло. Тиде мый улам. Кум ий ончыч ачам ош тӱня гыч каен. Тудо мылам моткочак лишыл айдеме ыле, санденак, уке лиймекше, чонемлан моткочак йöсын чучын, йӱдым мален кертын омыл. Тунам мый Татарстанын чапланыше поэтессыже Резеда Валиеван почеламут книгажым чӱчкыдын кидыш налынам. Ик кечын кум шагат эр йӱдым лудын шинчымем годым сем шочо. Тунамак диктофоным чӱктышым да возышым. Тыге муро шочо. Мутшым Светлана Григорьева деч марлаҥдаш йодым. Тудо моткоч кӱчык жапыште ямдыленат шуктыш. Икмыняр жап гыч Марий Эл радиошко намиен пуышым.

Тудо йӱдым эше ныл сем возалтын. Таче кечылан индеш мурем уло. Ынде нунылан аранжировкым ышташ да сценылан келшен толшын сылнештараш кӱлеш. Кок мурылан мутшымат шкеак возенам. Иктыже кокымшо йочамлан, лу тылзаш ӱдыремлан, пöлеклалтын. Весыже — йöратымаш нерген.

— Тугеже икмыняр ий ончычшо марий мурым йоҥгалтараш мо таратен?

—  Марий мурым мураш кумылем шукертак лийын. «Уржа пасу» мурым колышт лекмеке, семже моткочак келшен, санденак мураш тöчен ончаш шонен пыштенам. Тиде куд ий ончычак лийын. Но тунам марий йылмым йöршын пален омыл да мут-влакым ойлымо годым йöсылык шижалтын. «У ий мурым» ямдылаш мыняр-гынат куштылгырак лийын.

— Чынак, тудым тый марий ӱдыр семынак сылнын мурет. Марий огыл улмет лач ик вере «йöратем» олмеш «йоратем» манмет гыч гына палдырна.

— Келшем. Тушто эше тыгай ойсавыртыш уло: «У ий йӱд». Ик мут «й» дене пыта, весе тудын денак тӱҥалеш. Тидыжак мылам эн неле лийын, сандене мыняр гана уэш-пачаш мураш пернен?!

— Эшеат чот йöсланаш огыл манын, тый шагал да икмыняр гана кучылталтше мутан почеламутым ойырен налынат?

— Туге. Но тыге гынат, тиде мыйын пытартыш марий мурем огыл, эше лийыт, шонем.

— Тыйын марла мураш кумылет чотак уло, коеш. А ават, ачат, пелашет, родет, йолташет-влак татар улыт. Нуныжо тидым кузерак вашлийыт? «Тылат тиде молан кӱлеш?» манын огыт ойло?

— Уке. Иктат ик ганат уда мутым ойлен огыл. Мурызо-влак тӱрлö калыкын мурыштым мурат гын, тиде сай гына, шонем. Мутлан, мый, татар ӱдыр, марла мурем гын, тидын дене татар-влаклан марий культура дене палыме лияш полшем, шонем. Такшымат, Марий Элыште илет гын, тыште илыше тӱҥ калыкым, марий-влакым, пагалыман, тиде пагалымашым ончыктыман, шонем.

«Марий Эл ТВ»-н Сания Рамай нерген видосюжетше:

Любовь Камалетдинова
мутланен

Снимкыште: Сания Рамай

Текстым «Марий Эл» газет да видеом video.vmariel.ru гыч налме.

3 комментария

Filed under Артикль-влак, Видео

3 responses to “Татар ӱдыр марла мура (ВИДЕО)

  1. Марий

    Пеш сай, тек марла рушат, татарат, моло калыкат мура. Вот эше марий мурым Россий да тӱнямбал кӱкшытыш иктаж-кузе лукташ кӱлеш.

  2. Петан

    Сай мурат гын — сай. Тока, ме пеш колыштына йот айдемым, садлан, писын нуно гае акцент дене мураш тӱҥалына дыр. «Модный» шонена.

  3. Марий

    Да, Петан, чын кутырет. Уло тыгай проблеме, теве южо марий мурызо Славыным сотарен руш акцент дене мураш тӱҥалын. Конешне, Славин марий эстрадыш у шӱлышым пуртен, шонем, тудо титакан огыл, ме марий-влак шке йылмынам, культурынам шукырак пагалышаш улына.

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google photo

Для комментария используется ваша учётная запись Google. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s