Йыван Кырлан шочмыжлан — 100 ий

kyrla_konferenciiПагыт! Теве мо чылалан куатле оза улмаш! Шочмо калыкнан эн лӱмлö айдемыжлан тудо шӱдö ийым кучыктыш. Шернур район, Оно Морко Купсолан эргыже лӱмлö поэт да тӱнямбалне чапланыше киноактер Йыван Кырлан шочмыжлан 17 мартыште ик курым теме.

Тидын вашеш Шернурышто Николай Заболоцкий лӱмеш кокымшо номеран кыдалаш школышто «Йыван Кырла лудмаш» икымше шанче-практик* конференций эртен. Мер калык Марий Элнан чыла кундемлаж гычак рӱж чумырген ыле.

Марий кугыжаныш университетын, Валериан Васильев лӱмеш Йылмым, литературым да историйым шанчын шымлыше марий институтын ученыйжо, школласе туныктышо ден тӱвыра пашаеҥ-влак уста марий айдемын возымо сылнымутшо, йылме куатше, кино сымыктышыште кодымо волгыдо кышаже нерген шымлымыштым иктешленыт.

Чумыргышо калыкым Марий Эл Виктер* вуйлатышын алмаштышыже, тӱвыра, печать да калык-влакын пашашт шотышто министр Михаил Васютин, Шернур муниципал район администрацийым вуйлатыше Николай Лебедев саламленыт.

Пленарле* вашлиймаште Йыван Кырлан илыш корныж нерген «Ончыко» журналын вуйыншогышо* секретарьже, «Легендыш тошкалше Кырла» погым чумырышо Юрий Соловьев ойлен. Сылнымут поянлыкшым МарНИИЯЛИ-н кугурак шанче пашаеҥже*, йылмышанче* кандидат Леонид Бурков иктешлен. Историй наука кандидат Никандр Попов этничностьым вияҥдымаште интеллигенцийын верже нерген докладым лудын.

Конференций шке пашажым ныл секций кышкарыште чоҥен. Йылмышанче доктор Анатолий Куклин шочмо йылме нерген кумда да келге мутланымашым вӱден. Сылнымутын тачысе кечыже, Йыван Кырлан калык ойпого гыч шочшо сылнымутшо нерген йылмышанче кандидат Силантий Сабитов, краеведений да кундемысе историй йодышым Иван Ялтаев рашемдаш полшеныт.

Конференций икымше гана театр да кино сымыктыш нерген мутым лукташ йöным ыштен. Ты секцийын пашажым тӱвырашанче* доктор Г.Е.Шкалина, Марий самырык театрын режиссёржо Олег Иркабаев вӱденыт.

Докладым лудаш шӱдö утла йодмаш пурен ыле. Шочмо йылмым да сылнымутым туныктышо-влакын пашаче кумылышт поснак шинчалан перныш. Тыгодым ятыр туныктышыжо ойлымыжым мультимедиян проект дене пеҥгыдемден. Йыван Палантай лӱмеш тӱвыра да сымыктыш колледжын студентше-влак М.Карюкина, А.Сазонова киносымыктышыште марий актер-влакын пашаштым шымлымышт дене куандареныт.

Тылеч посна Никандр Попов, Родион Чузаев интеллигенцийын верже нерген «Йыргешке ӱстел» воктен шокшо мутланымашым тарватеныт. А Марий курчак театрын ончыктымо «Колыбельная» спектакльын ю куатше, «Муралтем мый йывыртен» сылнымут да калык ойпого кас эше ятыр еҥын чоныштыжо илаш тӱҥалеш.

Конференций Йыван Кырлан 100 ияш лӱмгече идалыкшым почын. 26 мартыште «У вий» ушем талешкын лӱмжым нумалше Марисола кыдалаш школышто финно-угор университетын шошо сессийжым почеш.

Ты кечынак М.Шкетан лӱмеш Марий калыкле* театрын артистше-влак Ю.Соловьевын пьесыж почеш «Йыван Кырла» спектакльым ончыктат. Тылеч посна театр пашаеҥ-влак мыланна Кырла нерген вучыдымо, палыдыме оҥайым темлаш тӱҥалыт. Ушныза мер калыкнан илыш йогынышкыжо. Йыван Кырлан 100 ияш лӱмгечыжым сото чонда дене волгалтарыза.

Зоя Глушкова

* шанче-практик — научно-практический, пленарле — пленарный, вуйыншогышо — ответственный, йылмышанче — филологий, Виктер — Правительство, кугурак шанче пашаеҥ — старший научный сотрудник, тӱвырашанче — культурологий, калыкле — национальный

Йыван Кырлан 100-ияш лӱмгечыжлан пӧлеклалтше  «Марий Эл ТВ»-н видеосюжетше:

Снимкыште: пленарле мутланымашым Никандр Попов вӱда; конференций годым.

Текст налмывер: «Марий Эл» газет

Видео: http://video.vmariel.ru

1 комментарий

Filed under Артикль-влак, Видео

One response to “Йыван Кырлан шочмыжлан — 100 ий

  1. Петан

    Чыным манаш гын: тиде конференций огыл — а Марий Элысе мари-влакын Погынжо! Ушан-шотан, ару аран мари-влак пеш кӱлешан пашам ыштеныт! Маяковскийын мутшым савырем: — Ме, шкенам, Кырла йымалне эрыктена! Кушто доклад-влакым лудаш лиеш? Ала 8-ше Погынын гае, «йомыт»?

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s