Эртыше кугарня Нефтекамск оласе калыклан пайрем сынан лие. Пайрем касым «Чолман» редакций, оласе марий культур мер рÿдер да марий йылмым туныктышо-влак эртареныт.
Пырля чумырген пайремлымаш Шочмо элнам аралыше да Воин-интернационалист-влакын кечыштлан пöлеклалтын. 15 февральыште Совет войскам Афганистан гыч лукмылан 20 ий теме.
Мутат уке, ласкан каналташ погынышо верысе калыкын вучымо унаже «Канде кава» ансамбль лийын, вет тудланат, лач 23 февраль вашеш шочшо коллективлан, тений 10 ий темеш.
«Муро – мыйын илышем» — тыге манылтын тиде ансамбльын лу ияш лÿмгечыжлан пöлеклыме концертше. «Марий касыш» лишыл ялла гычат толыныт ыле. Марла тувырым чиен, концертыш коштшым, залыш лектын, «кандырам пунышым» Нефтекамскыште ужын, нигö ок öр.
Лу ий — йочан модын-юарлыме жапше гына. Но артистын тиде жапыште коштмо корныжо – рончен пытарыдыме мундыра. Мутат уке, сценыште тÿжем дене муро йоҥген, артист-влакат вашталтыныт. Таче сценыште икшывыштат чÿчкен-муралтат. Теве куд ияш Алексей Байназовын Калтаса вел такмакше-влакым калык совым рÿж кырен вашлие.
Концертыште тыгак воин-интернационалист-влакым, Афганистан сарын участникше-влакым, саламлышт, пöлекым кучыктышт, а «шокшо точкышто» лийше-влаклан С. Байназов шке возымо мурыжым пöлеклыш.
Марий ученый Валериан Васильевын бюстшылан оксам погаш яшлыкым ямдылыме ыле. Концерт жапыште тидлан кумылан еҥже кертмыж наре пыштен.
Кум шагат наре шуйнышо концерт мучашке лишемын гынат, калык мöҥгö вашкен огыл, фойеште шер теммеш мурен-куштымеке веле уна-влак дене чеверласен.
М. АЛИКАЕВА
Нефтекамск ола
Налмывер: «Чолман» жаплышташ
MariUver 