Тӱҥ онаеҥ Александр Таныгинын У ий пайрем дене саламлыме мутшо:
О, порын толын, кумылнам нöлтен шого, Он Тӱҥ Сандалык Юмо!
У ий пайремет дене, ужар шаган кожет дене, тичмаш кинде сукырет дене, ош туарат дене, тичмаш салмавушет дене эртен кодшо пагытлан тынысым, шулыкым, серлагышым пуыметлан марий калык лӱм дене вуйнам савена. Сандалык Юмына, у идалыкым у пиалан илыш дене чапландарен шого.
О, порын, сай пӱрымаш дене толын шогыза, Кугу Пӱрышына, Кӱлдö Пӱрышына, Эрге Пӱрышына. Кугу Серлагыш, марий калыкын илыме аҥажым кугу мардеж деч, кугу вӱд деч, кугу тул деч, йот коштанын осал шинчаж деч, калык кокласе лавыран шомак деч арален шого.
О, порын толын йöратен шого, Мер Кугу Юмына. Йӱла ден йӱла кучымаште, тӱс ден тӱс кучымаште, эл ден эл кучымаште поро мер каҥашым пуэн шого.
Иза-шольо, ака-шӱжар, тулар-тулаче-шамыч! Ош Сандалыкын вий-куатан у идалыкыштыже кавасе йӱксö корно гай кужу ӱмыран лийза, шӱдыр шинча гай чӱчкен илыза, тылзе чурий гай шыма, мардеж гай писе лийза, пыл гай оварген шогыза, яндар вӱд гай виян лийза, волгенче гай чулым шогыза.
Еш кышкарда тӱзланен, суртпечыда нöлталтын, уэмдалтын шогыжо. Кинде клатда пургыжалт, кум тӱрлö вольыкда тӱланен, мӱкш отарда шем пыл гай нöлталт, мӱй клатда саска пуш дене ӱпшалт шогышт. У ий дене! Эсен, тазан илыза!
Налмывер: «Марий Эл» газет
MariUver 