23 декабрьыште Марий тӱвыра рӱдер Йошкар-Оласе йочасадышке да школышко коштшо йоча-влаклан «Йомакыш унала» марий елкым эртара.
У ий дене саламлаш нуным Йӱштӧ кугыза ден Лумӱдыр, эртыше да толшо ийын символышт «коля» ден «ӱшкыж», чодырасе янлык-влак толыт.
Сценарий почеш йоча-влак марий тӱняшке логалыт. Коля ден ӱшкыж нуным марла кутыраш туныктат, У ий кожлан марий мурым мурыктат.
Йоча-влак Йӱштӧ кугыза ден Лумӱдырым вучат. Но вучымо унаштым вувер кува йот йомакыш наҥгаен шуэн, пӧлекыштым поген налын. А тушеч лач марий йылмым, марий мурым, почеламутым, куштымашым пален гына нуным пӧртылташ лиеш. Садлан йоча-влаклан марий йылмым палымыштым сайынак ончыкташышт перна.
Икшыве-влакым Йӱштӧ кугыза деч тамле да шарнаш кодшо пӧлек-влак вучат.
Г.Хлебова
MariUver 
Могай тыгай «ёлка»? Марий йылмыште тыгай мут уке. ЁЛКА = КОЖ.
«Марий мутер», I том, Йошкар-Ола, 1990, 443 лш: «ЁЛКА — новогодняя ёлка; праздник вокруг украшенной ёлки». КОЖ — мутын «У ий пайрем» значенийже уке. «марий кож вуча» манмым лудшо тыге умылен кертеш: марий чодраште шогышо кож шкеж деке йоча-влакым вуча.
Уке! А кузе рушшамыч «ёлка» мутым эре кучылтат да умылат?
Тыште «марий у ий кож вуча» манаш лиеш.
Конешне, «ёлка» мутым вашталташ лиеш, «У ий пайрем», «У ий кож» манаш лиеш, но вет калыкыште «ёлка» мутшат пеш чот шарлен. Вуймут кӱчык да раш, лудаш таратыше лийшаш.
«Конешне» тыгак марий мут огыл, марла «мутат уке» але «ойлыманат огыл» каласыман. Интернетыште сайрак яндар марий йылмым кучылташ. Калыклан яндар марий йылмым ужаш да тунемаш йӧн лиеш. Тау!