Кыце пäленä, халыкын культурыштыжы литература дон сирӹмäш культура сек тӹнг вäрӹм йäшнäт. Пӹтäртӹш ивлäн марынвлä лошты у айо кымдан пäлдӹртäлтеш, тидӹ – Марий Тиште кечӹ, кыды 1775-шӹ ин 10-шы декабрьын Санкт-Петербургышты лäкшӹ пӹтäриш мары грамматика доно кӹлдäлтеш. Грамматикӹн авторешӹжӹ В. Пуцек-Григорович шотлалтеш.
Ти айом Марий Элышты веле агыл, тенгеок вес сäндäлӹквлäштäт аят. Тене ти кечӹ Суомин вуйхалаштыжы Хельсинкиштӹ М. А. Кастрен Ушемӹштäт айымы лин, кыды сӹлнӹшая вады семӹнь эртäрäлтӹн.
Тӹнг организаторжы мары литературым шӹмлӹзӹ доктор Софья Чеснокова лин. Тӹдӹ аудитори анзылны мары йӹлмӹн дä литературын кӹзӹтшӹ систуацижӹ гишäн шайыштын дä мары поэтвлäн лыдышвлäштӹм лыдын. Валентин Колумб дон Альбертина Иванован пäшäвлäштӹ финнлääт сäрӹмäт, ти кок поэтӹн лыдышвлäштӹм лыдын.
Лыдышвлä гӹц пасна Сергей Чавайнӹн шукердӹ агыл финнлä сäрӹмӹ ”Элнет” (сäрӹзӹ Арто Мойсио) романжы гӹц лаштыкым радиожурналист Катарийна Лахтонен лыдын. Аудитори Софья Чеснокован шаяжым кого интерес доно колыштын, махань-шон ядмашвлäм пуэн. Вадышкы толшы хынавлä литературына гӹц пасна, мары качкышвлä донат пäлӹмӹ линӹт дä перемеч дон ӱячам тотешт кердӹнӹт.
Айовлäштӹ соок тама у дä вычыдымы лиäлтеш, ти ужым шӹренжок сäмӹрӹквлä кандат. Ти гäнä ум кандышы сäмӹрӹк сирӹзӹ Катя Кетту ылын, кыды сӹлнӹшая айошты сирäш тӹнгäлмӹ у романжы гишäн шайыштальы. Пäледä ма интересныйжы? Ти романын тӹнг персонажшы Марий Элышкы кеä дä мам тӹштӹ ӹштӹлеш, тидӹм роман лäкмӹкӹ пäлен нäлӹнä.
Ӹнянӹмӹ шоэш, Марий Тиште кечӹм Суомиштӹ ӹлӹшӹ марынвлä веле агыл, вес сäндäлӹквлäштӹ ӹлӹшӹ марынвлääт пäлдӹртäш тӹнгäлӹт.
Фотошты шалахай гӹц вургымлашкыла: сäрӹзӹ Юлия Куприна, радиожурналист Катарийна Лахтонен, Софья Чеснокова, Кеийо Вääри, М.А.Кастрен Ушемӹн проектвлäн секретарьжы Марья Лаппалайнен дä Роза Игнаева.
Валери Аликов,
Хельсинки
Авторын фотожы. Фотосӱретым кугемдашлан темдал.
MariUver 