«У вий» вуйлатышым армийыш налыт

Корныштыжо, Юмо, пиал дене коштыкто

Тыгай сугыньым армийыш ужатыме годым самырык еҥлан каласен колтат. Самырык-влакын «У вий» ушемыштым вуйлатыше Владимир Андугановын армийыш кайымыжым пален налмеке, тудын дене вашлийын мутланышым да, сугыньым каласыде, мыят шым чыте.

— Володя, армийыш каяш кумылет уло мо?

— Тидын шотышто чот ом пуштылане. Ик могырым, кайыме шуэш, а вес велымже, чон тушко пешыже ок шупш.

— Векат, армийыш кайыме деч ончыч шочмо Пошкырт мландышкет миен коштыч. Ача-ават салтакыш кайымет нерген уверым кузерак вашлийыч, могай сугыньым пуышт?

— Ача-авам изишакше пуштыланат, но тидым ончыкташ огыт тырше, таза кап-кылан, пӱсö уш-акылан пöртылаш сугыньлышт. Тыгак, таза пöртылаш манын, шкенан вел тошто марий йӱламат шуктеныт: кинде шултышым пӱчкын, вуй йыр савыреныт да тудым толмешкем кошташ пыштеныт. Служитлен пöр-тылмеке, мый тудым кочшаш улам. Родо-тукымем вачӱмбаке шовычым пыштеныт.

— Армийыште мер пашам шуктен шогаш тӱҥалат мо?

— Тидын шотышто каласаш але эр, эн ончыч частьышке сайын миен шуман, но иктаж-мо оҥай лектеш гын, чынжымак, мер пашам ышташ кумыл уке огыл.

— Кеч-могай рвезат элитный войскаш логалнеже, а тый могай войскаште служитлынет ыле?

— Лӱмын шонен шинчен омыл, тыгеже военно-морской флотышто служитлаш тӱҥалам. Армий рвезым талыракым, виянракым ышта, тӱням ужын кошташ йöным пуа, жап эртымеке, мом шарналташат лиеш. Тылеч посна у корно почылтеш, армий деч нимолан лӱдаш.

— Марий Элыште йöратыме ӱдырет кодеш. Тудо тыйым армийыш кузерак ужата?

— Мутат уке, шке семынже тургыжлана, вучаш тӱҥалеш, «Нимат огыл, ик ий веле. Тидым чытен, илен лектына», — манеш.

— Тыйже каен колтетат, «У вийже» кöн кидыште лиеш але умбачын вуйлаташ тӱ-ҥалат?

— Организацийым мы-йын укеште Марий кугыжаныш университетын тӱвыра да сымыктыш факультетшын 4-ше курсыштыжо тунемше Володя Токпулатов вуйлаташ тӱҥалеш. Тудлан чыла шотыштат ӱшанем. Володя шкежат пашан нелылыкшым умыла, сайын вӱдаш тӱҥалеш манын шонем.

— Самырык тукымлан могай тыланымашет лиеш?

— Армий деч ида лӱд. Ынде ик ий веле мöҥгö деч тораште лийман. Служба пеҥгыдылыкым, чытышым пуа, тыгодым элым аралаш тарата, кугешнымаш кумылым луктеш.

— Вес тыгай жаплан таза кап-кылан, сурт-печым кучаш, ял марий калыкым пукшен йӱкташ ситыше кумыл дене, ӱдыр налшаш пиал дене пöртыл. Коштмо корнет пиалан лийже!

Лидия ШАБДАРОВА
мутланен.

Налмывер: «Марий Эл» жаплышташ.