Таллинныште 13-14 ноябрьыште Эстон Йылме Инстутутышто финн-угор лексикографий семинар эртен
«Финн-угор йылме мутер-влак: мо дене икгай улыт да мо дене ойыртемалтыт?» семинарыш Венгрий, Финляндий, Россий да Эстоний гыч мутерзе-влак погыненыт.
Сыктывкар гыч Галина Некрасова коми лексикографийын тачысе кечыж да оныкылыкшо дене палдарен.
Тарту университетын доцентше Тыну Сейленталь венгр-эстон мутер нерген каласкален.
Одо мутер-влак нерген Светлана Едыгарова ден Вадим Данилов ойленыт.
Семинарын икымше кечым курык марла ”Шӹмшӹ тыр шошым” книган презентацийже дене кошартыме. Вийви Луйкын романжым эстон гыч курык марий йылмыш Валерий Аликов кусарен. Книгам савыкташлан оксам Эстонийысе родо-тукым программе ойырен, проектым Тартусо марий-влак ушем гоч пуымо.
Семинарын кокымшо кечыжын эстон, саам, лив мутер-влак нерген ойлымо. Марий йылме мутер-влак дене Валерий Вершинин палдарен.
Семинарыш толшо-влакын Эстон вишйуж тоштер дене палыме лийаш, эстон кочкышым тамлаш йӧн лийын.
Шанче погыным Эстон Йылме Институт гыч Свен-Эрик Соосаар ден Маргит Лангметс ямдыленыт.
MariUver
MariUver 
Семинар — пеш сай паша. Марий мутершанчым (лексикографийым) вияҥдыман. 10 томан “Марий мутерна” (Словарь марийского языка) 15 ий мучко лекте. 1-ше томын тиражше 25000, 2-3 — 5000, 4 гыч ик тӱжем гына. Вара тиде мутер шуко марийын мӧҥгыштыжӧ, ятыр школлаште, кнагагудышто уло мо? Лийынжат ок керт тыгай изи тираж да тынар кужу жап лекмылан. Мутерын кокымшо гана лукман, но 10 том пеш шуко, такшым чыал тиде материал кум кӱжгӧ томыш шыҥа. Йужо мутын ик значенийжлан 1-2 пеш кужу предложений сылнымутан произведений гыч кондалтеш — тиде мутерым кугемда. Шонем, предложений-влакым 2-3 мутан муткылдыш дене вашталташ лиеш. Эстон-влакын чынвозыш ÕS-мутерыштат тыгак ышталтын. Вара мутерыш у мут-влакымат шукырак пуртыман.