«Майатул» финн-угор театр-влакым чумыра

18-24 ноябрьыште Йошкар-Олаште Финн-угор калык-влакын театрыштын VII тӱнямбал фестивальышт эрташ тӱҥалеш

Тӱня кумдыкым авалтыше тиде фестивальын тӱҥ ойыртемжым палемдаш лиеш —  финн-угор театр-влакын артистышт спектакль-влакым шочмо йылмышт дене модыт. Тыге финн-угор тӱня утларак пойдаралтеш.

Икымше тыгай фестиваль 1992 ийыште Ижевскыште эртаралтын. А 1994 ийыште Финляндийысе Нурмес олаште йырже финн-угор театр коллектив-влакым чумырен. 1997 ий гыч «Майатул» тӱнямбал фестиваль ӱшанле «пыжашым» Марий кундемыште муын.

Эртыше фестивальлаште Российысе финн-угор калык-влакын тӱвыраштым вияҥдыме, калык-влак коклаште келшен илыме шӱлышым пеҥгыдемден колтымо раш шижалтын. Моско, Санкт-Петербург гыч театр критик, йот элла гыч театр  йодыш шотышто специалист-влакын аклыме мутышт, поро каҥашышт кугу пайдам пуэн. Европо кумдыкышкат финн-угор калык-влакын культур кылышт шуйналтын.

Пресс-конференций годым.Ты ганат тӱнямбал театр фестивальыш Мордовий, Удмуртий, Коми, Карелий, Коми-Пермяк автономный округ гыч театр коллектив-влак дене пырля  Эстоний, Финляндий гыч участник-влак толыт. Чылаже 11 спектакльым модын ончыктат. Фестивальыште 200 утла участник лиеш.

Тенийсе шушаш фестивальын темыже тыгеракын йоҥга: «Национальный, руш, тӱнямбал драматургийласе пьеса-влак негызеш шындыме спектакльлаште актерын мастарлыкше». Фестиваль жапыште жюри эн сай актер пашам ойырен налеш.

Участник-влак «эн сай пöръеҥ роль», «эн сай ӱдырамаш роль», «кокымшо планан эн сай пöръеҥ роль», «кокымшо планан эн сай ӱдырамаш роль», «эпизод шотан эн сай роль» номинацийлаште палемдалтыт. Сеҥыше артист-влаклан «Майатул» фестивальын сӱмбол шотан статуэткыжым да окса премийым кучыктат.

Теҥгече Марий Элын Тӱвыра, печать да калык-влакын пашашт шотышто министерствыштыже фестивальын оргкомитетшын еҥже-влак журналист-влак дене вашлийыныт. Тушто палемдыме гыч рашемын: тиде кугу мероприятийым эртарен колташ тӱрыс ямдылалт шумо.

Кугу полышым Российын Культур министерствыже, Марий Эл виктер, Марий Элын Тӱвыра министерствыже ойырат. Тиде пресс-конференцийыште Марий Эл виктер вуйлатышын алмаштышыже, Тӱвыра, печать да калык-влакын пашашт шотышто министр Михаил Васютин шкежат лийын.

Юрий ГРИГОРЬЕВ

Налмывер: «Марий Эл» жаплышташ