«Марий Эл радио» эстраде муро конкурсым увертара

venataСамырык-влак коклаште тӱвыра поянлыкым шуараш, нунын талантыштым, самодеятельный да профессионал моштымашыштым вияҥдаш, шонымашышкышт шуаш полшаш, калык йӱлам пояҥдаш. Нине шонымаш-влак «Яндар муро» марий эстраде фестивальым эртараш тӱҥалаш амалым ыштеныт.

Тушто 15-35 ияш посна мурышо але тыгаяк ийготан-шамычым чумырышо коллектив-влак участвоватлен кертыт. Кумылан-влаклан 424006, Марий Эл, СССР Вооруженный Вийын 70-ше идалыкше лӱмеш урем, 20-шо пӧрт, «Марий Эл радио» адрес дене йодмашым 1 декабрь марте колташ йӧн уло. Тыгак (+7-8362) 630 381 номер дене йыҥгырташ, mari_records@mail.ru электронный почта дене серышым колташ лиеш. Ешартыш информаций дене http://www.mari-el.name сайтыште палдарат.

Конкурсышко йодмашым возымо годым участник фамилийжым, лӱмжым, ачалӱмжым, адресшым, ИНН-ын, страховой полисын да телефонын номерыштым, мыняр ияш улмыжым палемдышаш, а пашам аудио да CD войзымаш дене темлышаш.

Фестиваль кум тур дене эрташ тӱҥалеш. Икымшыште участник-шамычым нунын фонограммышт да видеовойзымашышт почеш аклат. Тиддеч вара келшыше мурызылан кокымшо турыш толаш ӱжмаш колталтеш. Кокымшо тур «Марий Эл радион» эфирыштыже эрта.

Кумшо турыш радиом колышто еҥ деч шукырак йӱкым погышо мурызым ӱжыт. Тиде радамыш логалаш манын, шке шотан, моло деч ойыртемалтше мурым йоҥгалтарыман. Тыгодым эн ончыч мурышын профессионализмже, мурымаште у йӧным да сай аранжировкым кучылтмыжо ончалтыт. Участникын посна койыш-шоктышыжат, мурен моштымыжат, мурын режиссурыжат шотыш налалтыт.

Фестивальыште кӱкшӧ акым налше участник-влаклан сольный аудиокассетым яра лукташ йӧн лиеш. Сеҥыше-влак продюсер полыш дене пайдаланен кертыт.

«Вената» конкурсышко ушнен

Чыла тидым шотыш налын, у конкурсышко «Вената» дуэтат ушнен. Таче ӱдыр-влак дене лишкырак палыме лияш темлена.

Вера Николаева ден Татьяна Антропова (снимкыште) изак-шолякын икшывышт улыт, шкешт Параньга районышто шочын-кушкыныт: Вера  – Ондропсолаште, Татьяна – Матародышто. Ынде Вера Матародо шешке лийын, кызыт ешыж дене Йошкар-Олаште ила. Тудо ончычсо И.С.Палантай лӱмеш музучилищысе вокал пӧлкам тунем пытарен, кызыт йоча садыште тырша да МарКУ-со тӱвыра ден сымыктыш факультетыште заочно тунемеш.

Самырык вате-марий «Марий памаш» ансамбльышке коштыт. Пӧреҥат мура, гитара дене шокта. Тыгак нуно ӱдыр икшывым куштат.  Кок ият кандаш тылзаш Стася (Станислава) Николаевмыт ешыште утларак усталык шӱлышан, очыни. Вет тудо мураш да микрофон олмеш телевизорын пультшым налын ковыртаташ моткоч йӧрата – ончен куанет.

Татьяна Антроповат таче Йошкар-Олаште ила да 25-ше №-ан коррекционный школышто воспитатель-педагоглан кокымшо ий пашам ышта. Ӱдыр шке жапыштыже Президент школ-интернатыште художниклан, МОСУ-н филиалыштыже психологлан тунемын. Вара тудо Краснодар крайышке логалын, «Орлёнок» Всероссийский йоча рӱдерыште воспитатель лийын. Тунам тудо усталык шӱлышыжым вияҥден, вет йоча-влак дене пырля мурашат, тӱрлӧ конкурсышто участвоватлашат пернен. Туге гынат сценышке артист семын лекташ ик ганат шонен огыл.

Татьяна лачак «Марий Эл радион» концертышкыже мийыме годым Вера шӱжарже деч йодын: «Мураш ынде тунемынат, а ончыкшым тиде пашам ворандараш шонет уке?» Тудыжо «шонем» манын пелештен, а икмыняр жап гыч пырля муралташ темлен. Тыге Вера ден Татьяна ӱмаште «Ший памаш» конкурс годым икымше гана сценышке лектыныт, а «Вената» дуэт семын декабрьыште шке возымо «У ий» мурыштым йоҥгалтареныт.

Ӱдыр-влакын палемдымышт почеш, тӱҥалтыште нуно шке репертуарыштым утларак да утларак пояҥдаш тыршеныт, а ынде сценыште пашам ыштыман, яллашке лектын коштман. Вет нуным таче радио гоч ятыр муро дене сайын палат гын, шкеныштым южыжо ик ганат эше ужын огыл. Сандене «Ит йом», «Молан», «Сылне жап, «Ал пеледыш», «Тылат», «Улат шонымем» да моло мурымат зритель ончылно угыч да угыч мураш кӱлеш.

«Вената» дуэт шуко мурылан семым шкеак келыштара, мут-влакым Татьяна воза. Тунамак самырык мурызо-влак Михаил Якимовын сборникше дене пайдаланат. Теве «У ий» мурылан семым Одропсоласе гармонист, клуб пашаеҥ Эрик Смирнов, а мутшым Параньга районысак Ермучаш ял гыч Нина Малинина шотлан конденыт. Вера ден Таня руш да немыч сем-влакланат марий шомак-влакым келыштареныт.

Мастар ӱдыр-влак тӱрлӧ ешыште кушкыныт. Теве Веран Надежда аваже тачат фельдшерлан тырша, Виктор ачаже ӧрдыж кундемыш лектын коштеда. А Татьянан ачаже Василий Абросимович – Матародо школ директор, аважат Светлана Иосифовна школышто биологийым туныктен, тений гыч – пенсийыште.

Оҥай, кушеч «Вената» манме шомакше лектын? Тудо Вера Николаева, Антропова Татьяна манмым ончыкта. Тыгай шонымаш йӧршын вучыдымын, ӱдыр-влакын маршруткышто кудалмышт годым шочын. Да, ончыкшым «Вената» пиалан, чынак, шӱдыр сынан лиеш манын ӱшаныме шуэш. Молан манаш гын Вера ден Татьяна шке пашаштым йӧратат, изи огыл шийвундым пышташ йодшо сомылыштым уло кумылын шуктат.

«Айдеме шочмекак мураш тӱҥалеш, — иктешлыш Т.Антропова. – А кумылым нӧлтышӧ, шӱм-чоным тарватыше еҥ гына сценышке лектын кертеш. Ик ӱдыр каласен ыле: «Тиде — муро дык муро, капемланат копыж лие». Чын мурызым колыштмо годым эре тыге лийшаш. Мом ойлаш, илышыжак – муро».

В.Николаева ешарыш: «Ик гана сценышке лекмеке, тушко угыч да угыч шупшеш. Тиде кумыл кажне мурызылан палыме. Калыкым куандарымаш, у сылнысем-влакым шочыктымаш чонышто у шижмашым ылыжтат. Муретым еҥ-влак тыйын семынак умылат гын, тугеже профессионал марте кушкын шуынат, но умбакыжат вияҥаш кӱлеш».

Ӱдыр-влаклан чын профессионал мартеак кушкаш тыланена. Тек эре калык пагалымаш, у творчество кӱкшыт куандарат!

Эльвира Куклина

Налмывер: «Кугарня» газет

1 комментарий

Filed under Артикль-влак

One response to “«Марий Эл радио» эстраде муро конкурсым увертара

  1. Света

    Мырыда, мырыда. Мынь мырымыдам колыштам. Тенгечы Цикмашты «Полярная звезда» концертым анжыктен. Олег Славин дон Леха Ленинат алыкмарла мыревы. Ныны алыкмарын ылыт?

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google+ photo

Для комментария используется ваша учётная запись Google+. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s