Марий Юмым моктышо кантата

Вӱргечын «Марий шыже-2008» фестиваль шке пашажым мучашлыш. Иван Палантай лӱмеш тӱвыра колледжын залыштыже Марий Элын Алексей Искандаров лӱмеш кугыжаныш да Чуваш Республикысе симфоний капелла-влак шке мастарлыкыштым ончыктышт. Нуно Сергей Маковын Зоя Дудинан мутшылан возымо «Кӱсото» кантатым йоҥгалтарышт.

Икымше гана марий сем сымыктышна марий юмынйӱла тема деке мелын савырныш.

Тиде концертым Марий Элын культур илышыштыже мастарлыкын куатшым чапландарыше кугу событий семын ончыман. Автор-влак сем да мут полшымо дене кӱсотысо йӱла радамым колыштшо деке шуктен кертыныт. Кантата айдемын отышто улмо шижмашыжым, тудын чон йӱлымыжым, Ош Кугу Юмо деч чыла сайым йодын кумал сöрвалымыжым, сай пӱрымашлан ӱшанжым раш почын ончыкта.

Вич ужаш хорлан да кум солистлан (бас, баритон, тенор) мураш келыштаралтын. Икымше «Ош Кугу Юмо» ужаш пеш куатлын йоҥгыш, кокымшыш калык кумалме сӱретым шыҥдарыме. Тыгодым хор пелен тенорын йӱкшö кава гыч йоҥгымо гай солныш. Шыма сем савыртыш Пиямбарлан писын да кöргö вийым ончыктен ойлымо мут дене вашталте.
Нылымше ужаш угыч волгыдо кумылан Юмо-суксылан пöлеклалтын: «О Юмо-суксо, ош марийын ош чонжым арале!» Визымше — «О куатан Сандалык Кугу Юмо!» — чап  муро семын йоҥгыш.

Хорын тыматле йӱксавышеш эшеат тыматлыракын мурышт кум солист-влак, а мучаште иктеш ушнышт.

Колышташ толшо калык лӱм дене кугу таум ойлымо шуэш хор-влакын вуйлатышыштлан: Россий Федерацийын, Чуваш Республикын калык артистше Морис Яклашкинлан, Россий Федераций искусствын да Марий Эл Республикын сулло пашаеҥже Антонина Вдовиналан, Россий Федераций культурын сулло пашаеҥже Людмила Фадеевалан.

Марий Элын сулло артистше-влак Александр Беляев, Вячеслав Созонов, Евгений Розов почеламутысо мутын куатшым, сем савыртышыш шыҥдарыме шижмашым раш ончыктышт. Нунын марий искусство дене илыше кöргö шӱлышышт порылык кумылым чапландарен. Тыге солист-влак сценыште марий калык пайремым ончыктен кертыныт.

Роза Артищева,

Россий Федерацийын, Марий Эл культурын сулло пашаеҥже.

Снимкыште: тӱҥ онаеҥ А.И.Таныгин,  автор-влакым саламлен, М.Яклашкинлан теркупшым упшалта.

М.Скобелевын фотожо.

Налмывер: «Марий Эл» жаплышташ.

Оставьте комментарий

Filed under Артикль-влак

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google photo

Для комментария используется ваша учётная запись Google. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s