Прокопьевмытын пӧртышт
Дина Прокопьева (ӱдыр фамилийже — Алексеева) Кужеҥер районысо Шойдӱҥ ялыште шочын-кушкын. А илыш пӱрымаш тудым кандаш ий ончыч Пермь кундемысе марий-влак коклашке конден.
Н.К.Крупская лӱмеш Марий кугыжаныш пединститутын руш-марий пӧлкажым тунем лекме деч вара Пермь кундемыште илыше кокаж дек паша верым кычал толеш да Эҥермучаш школышто туныкташ тӱҥалеш. Вич ий марий йылме ден литература, руш йылме да историй дене шинчымашым пуымек, ты паша деч кораҥеш. «Пушкыдо кумылан улам, а йоча-шамыч осалланаш йӧратат, санденак школ гыч кайышым», — манеш Дина Ивановна.
Марий шӱлышеш шуарат
Туге гынат школышто марий шӱлыш дене икшыве-влакым куштымо жапым сай пагытлан шотла да тиддене кугешнен ила. Йоча-влаклан марий тӱр, тувыр выставкым эртарыме. Книгам, альбомым шуко сӧрастарыме. Тушто палыме да лӱмлӧ еҥ нерген, вер-шӧрын кузе шочмыж нерген шымлымашым возымо, композитор Юрий Евдокимов-Тойварс, писатель Илья Васильев нерген материал-влак улыт.
«Пашам ыштымем годым пырдыж газет семын «Марла календарьым» луктын шогенам. Марий почеламутым сылнын лудмо конкурсым чӱчкыдын эртаренам. Тӱҥалтыш класслаште открытый урок годым тӱрлӧ вел тувырым чиен ончыктенам. Олимпиадымат эртаренна ыле. Кызыт школыш 85 тунемше коштеш. Тений 1-ше классыш вич йоча кая. Тыште кок пачашан школ чоҥалтшаш ыле. Но тудым 10 меҥге торашке руш ялышке, Породиныш (Бор), наҥгаеныт. А туштыжо 30 еҥ веле тунемеш. Мемнан-шамычлан тушто неле, сандене ӱдыр-эрге-шамыч угыч тошто школышто тунемаш тӱҥалыныт. Но оборудований чыла тушанак кодын. Йоча садым уым чоҥымо. Адакат школым Породиныш кусараш кутырат. Но тыге туныктышо-влаклан паша вер пыта, йоча-шамычлан кошташ йӧсӧ лиеш, а тушто интернат уке», — шарналтен ойла Дина Ивановна.
Прокопьевмыт
Прокопьевмыт еш
Дина озанлыкын ончычсо председательже Валентина Дмитриевнан Иван эргыжлан марлан лектын. Кок шочшым куштат. Кызыт Дина ава лийшыжын шукерте огыл почмо «Полюшко» кресаньык озанлыкыштыже тырша. Такшым самырык вате кевытыште шогылтеш, калыклан кочкышым ужала.
Ача лийшыже, Владимир Александрович, шоферлан пашам ышта. А Иван шке машинаж дене Пермьышке тӱрлӧ пашам шукташ кудалыштеш. Саша эргышт куд ият пелаш, тений школыш кая. Лудын, шотлен мошта. Лена 15 июльышто ныл ийым темен. Саша марий концертым йӧрата. Ӱмаште тывырдикым кушташ тунемын. Тений изи ньога-влакын 8 мартлан концертым ончыктымышт годым Саша ден Лена сценыште марла куштеныт. Нуным калык совым рӱж кырен вашлийын. Тыште музыкантлан тыршыше Светлана Петровна Евдокимованат надырже кугу.
Икманаш, Прокопьевмыт ешыште марий койыш йомын огыл. Чоҥен шындыме чапле суртыштышт чӱчкыдынак марий сем шокта, марий шомак-влак йоҥгат. Эсогыл пӧрт йырымсе печыжымат марий тӱр дене келыштарыме.
Эльвира Ендылетова
Налмывер: Кугарня
MariUver 