«Марий теле» фестиваль кум тылзе шуйна

Теле тылзын 13-шо кечынже Йошкар-Олаште «Марий теле» фестивальым пайремлын почыныт. Тудо кум тылзе шуйна, увертара «Кугарня» газет.

Ты кечын Йошкар-Олаште, чынжымак, юзо шӱлыш озаланен. Никонов лӱмеш кумдыкышто, Чавайн бульварыште, Рӱдӧ паркыште шуко мурымаш, куштымаш йоҥгеныт, уремлам тӱрлӧ тӱсан гирлянде сӧрастарен. Никонов лӱмеш площадь гыч Рӱдӧ парк марте район-влакын сылнештарен шогалтыме кожыштым вераҥденыт. Пайремыш чумыргышо уна да еҥ-шамычым йомакысе талешке-влак вашлийыныт. Нуным кажне гаяк йолтошкалтышыште ужаш йӧн лийын.

Ты фестивальын эн кугу событийжылан Йӱштӧ Кугыза да Лумӱдыр-шамычын тӱшка таҥошкылмашыш ушнымыштым шотлыман. Йошкар-Оласе уремла дене 328 юзо еҥ эртен. Нуно Марий Эл, Татарстан, Чуваший республикла, Угарман, Виче, Ульяновск кундемла гыч лӱмын толыныт. Тыгак республикысе кажне гаяк район гыч коча ден уныкаже-шамыч ушненыт.

Марий Элысе Йӱштӧ Кугыза элнан тӱҥ Юзо кочажым вашлийын. Тудо кундемыштына икымше гана лийын. Варажым Ленин лӱмеш кумдыкышто шогышо кундемнан тӱҥ кожшым чылан пырля чӱктеныт. Тушто Марий Элым вуйлатыше Юрий Зайцев «Марий теле» фестивальым да У ий айо-влакым пайремлын почын.

Тений фестиваль нылымше гана лиеш. Молгунамсе семынак тудын кышкарыште оҥай, кумылым нӧлтышӧ да чоным савырыше мероприятий-шамычым эртараш палемдыме. Ты гана изыгумдык-влакымат кумдаҥдыме. Ынде ончычсо вер-шамыч деке Семёновка селасе, Тархановысо, Марий парк-влак ушнат. Чылаже ола мучко 16 площадкыште, тыгак тӱвыра да спорт учрежденийлаште мероприятий-шамыч лийыт.

Кум тылзыште 450 наре мероприятийым эртарышаш улыт. Уна-влаклан спорт таҥасымашым, усталык мастер-классым, ончерым келыштарат, концерт ден спектакльым ончыктат.

«Марий теле» фестивальын программыже поян да тӱвыргӧ лийшаш. Садлан, йолташ, тыят тушко ушно. Тек юзо шӱлышан теле тыйынат чонетым вӱчка, воза «Кугарня» жаплышташ.