«Яндексын» нейросетьше марий йылмым тунем шуктен: ынде тудо марла ойлымым умыла, текстыш савыра да вес йылмышкат кусара, увертара «Марий Эл» газет.
Тиде технологийын презентацийже эртыше кечылаште Марий Эллан 105 ийым палемдыме кышкарыште Йылмым, литературым да историйым шымлыше Валериан Васильев лӱмеш марий институтышто ((ЙСИШМИ) лийын. Тиде кумдан палыме «Яндекс» компаний деч марла каласыме ойым (йӱкым) текстыш савырыме да текстым йӱкаҥдыме технологий.
Презентацийын модераторжо – институтын шанче пашаеҥже Андрей Чемышев. Лач тудын кыртмен пижмыжлан кӧра марий йылмына интернет кумдыкышто эше ик ошкылым ончыко ыштен. Тымарте интернет дене пайдаланыше-влаклан марла гыч рушлаш печатлыме текстым гына кусараш йӧн лийын гын, ынде тушто марий йылме дене йӱкын каласымат рушла текстыш кусаралтеш. Мутлан, ик еҥ рушла каласа, а весе – марла гын, вашмутланымаш годым приложений ой-влакым кӱлеш йылмыш кусара да йӱкаҥда.
Вашлиймаште «Яндекс» компанийын регион дене вашкыл шотышто директоржо Антон Москаленков да кугыжаныш орган-влак дене пашам ыштыме шотышто директоржо Александр Болховитянов лийыныт.
ЙСИШМИ-н директоржо Людмила Григорьеван палемдымыж почеш, тыгай лектышыш шуаш манын, партнёр-влак дене 2016 ий гычак моткоч кугу паша ышталтын. «Российысе марий-влакын федералле калыкле-тӱвыра автономийыштлан да мемнан институтын шанче пашаеҥже-влаклан, Марий кугыжаныш университетысе коллегына-шамычлан, студент-практикант, Марий тӱвыра рӱдерын пашаеҥже да тыгак волонтёр ден журналист-влаклан кугу тау. Кеч-могай йылмым цифраҥдымаште ты технологийын кӱлешлыкше кугу. Таче пиалан улына, молан манаш гын айдемын ойлымыжо марла текстыш савырна – тидым ме эн ончыч ужына. Тиде технологий мыланна йылмынам йӧршеш палыдыме еҥ дене руш йылме гоч марла мутланаш йӧным ышта. Ончыкыжым тудым научный, тӱвыра дене кылдалтше мероприятийлаште, театрлаште кучылташ палемдыме», – каласен тудо.
Антон Москаленковын мутшо почеш, марий йылмылан ты технологийым вияҥдыме паша тудым «Яндекс.Кусарыше» сервисыш ешарыме тат гыч тӱҥалын. Кызытлан тиде сервис Россий Федерацийысе калык-влакын 15 йылмыштлан тыгай йӧным ыштен. «Ты технологий марий йылмын моло йылмыла дене вашкылжым пеҥгыдемдаш полша. Но, мыйын шонымаште, кеч-могай йылме тунам вияҥеш, кунам тудын дене кажне кечын мутланат. Ончыкыжым нуно эшеат шуко лийыт манын ӱшанена», – каласен Антон Москаленков.
Александр Болховитянов ешарен: Россий Федерацийысе калык-влакын йылмыштым аралыме дене кылдалтше проектым «Яндекс» компаний Российысе Калык-влакын пӧртышт да Калык-влак паша шотышто федералле агентстве полшымо дене илышыш пурта. Марий йылмым интернет кумдыкышто вияҥдыме шотышто тудын тӱҥ партнёржо – ЙСИШМИ.
«Йылме дене кылдалтше проектна калык-влаклан кызытсе технологий тӱняште жаплан келшышын вияҥмашке, йылмым арален кодымашке виктаралтын. „Яндекс.Кусарыше” сервисыш марий йылме (олыкмарий да курыкмарий) ик эн ончыч, 2016 ийыште, ушнен. Тымарте марла текстым руш але англичан йылмыла полшымо дене вес йылмылаш кусараш йӧн лийын. Ынде тушто йӱкын марла ойлымым текстыш савыраш да текстым йӱкаҥдаш лиеш. Тымарте тыгай йӧн ныл – татар, башкир, чуваш да удмурт – йылмылан гына лийын, марий йылме – визымше», – каласен Александр Болховитянов. Кызыт марий йылмым кучылтмо Яндексын сервисшылан 11 тӱжем утла еҥ эҥерта. «Ончыкыжым тиде чот кугемеш манын ӱшаныме шуэш. Аудиторий мыняр кугу, мыланна шке продуктнан качествыжым саемдаш тунар йӧн лиеш», – каласен тудо, воза «Марий Эл» газет.
MariUver
MariUver 