Югра «Марий ушем» мер организаций кодшо ийын губернаторын грантшылан конкурсышто сеҥен налме «Финн-угор этнофутуризм – цифран сылнысӱрет» проект почеш илышыш шыҥдарыме пашам мучашлен, увертара «Сурт-пече» газет.
Тудын кышкарыштыже марий сӱретче Юрий Таныгинын пашаже-влакым цифран йӧным кучылтын «ылыжтареныт». Тыге нуным ончашат оҥайрак лийын, икшыве-шамычлан веле огыл. Ончерыш еш дене толмат тидым пеҥгыдемдаш полша.
Проект 2030 ий марте палемдыме элысе калыкле политикын стратегий задачыже-влакым шуктымылан келшен толын. А кодшо ий элыште Еш идалык, а Юграште Калык-влакын чак лийме идалыкышт семын увертаралтын ыле.
Проект еш йӱла-влакым аралаш, этникле тӱшка-шамыч коклаште ваш умылымашым, кылым пеҥгыдемдаш полшаш шонымаш дене возалтын, сера «Сурт-пече» жаплышташ.
«Ылыжтарыме» сӱрет-влакым «КонтактЫште» мервотышто улшо «Финно-угорский этнофутуризм — цифровая живопись» тӱшкаште ончаш лиеш.
MariUver
Фотом Югра марий-влакын мервот лаштыкышт гыч налме
сылнысӱрет – живопись,
мервот – соцсеть,
жаплышташ – газета
MariUver 