Эстон да финн-влак Евровиденийын финалышкыже лектыныт

Кушкыжмын, 13-шо агаште, Швейцарийысе Базель олаште «Евровидений-2025» муро конкурсын икымше пелфиналже эртен, тушто лу финалзе рашемын. Нунын коклаште Эстонийым ончыктышо Томми Кэш (Tommy Cash) да Финляндийысе швед-влак гыч шогышо Швецийысе KAJ группо.

Финалыш лектыныт: Норвегий, Албаний, Швеций, Исландий, Нидерланды, Польшо, Сан-Марино, Эстоний, Португалий да Украина.

Мо оҥайже, KAJ группын Bara Bada Bastu («Айста так гына мончаште шинчылтына») мурыжо Финляндийысе швед йылмын вёроск диалектше дене, икмыняр финн мутым пуртен, возалтын. Тушто марий-влаклан лишыл yksi, kaksi, kolme — икыт кокыт, кумыт мут-влакат йоҥгат. Но коллектив Швецийым ончыктен.

Кодшо ийысе семынак, пелфиналыште «кугу вич эл» (Франций, Германий, Италий, Испаний да Кугу Британий) да вашлийше Швейцарий выступатленыт, кеч нунылан финалыште вер гарантироватлалтын.

Кокымшо пелфинал 15-ше агаште, финал – 17-ше майыште эртаралтеш.

Тений конкурсышто 37 эл участвоватла. Черногорий кок ий каныш деч вара «Евровиденийыш» пӧртылын, а Молдова финанс амаллан кӧра участвоватлаш тореш лийын, воза rus.err.ee.

Эстоний гыч Томми Кэш (Tommy Cash) мура:

Фотосӱрет-влак:

Рушла Telegram-ыште лудса /
По-русски читайте в Telegram:
https://t.me/mariuver/735

MariUver

пелфинал – полуфинал,
финалзе – финалист