Вӱдшор тылзын 26-шо кечынже Марий талешке кечым палемдена. Могай мероприятий-влак Йошкар-Олаште да Эстонийыште лийыт.
7 шагатлан Сергей Чавайнлан шарныктыш воктене марий меръеҥ-влак «Талешке сорта» акцийым эртарат. Варажым марий тӱвыра, шанче, туныктыш да моло сферыште чапым налше лӱмлӧ еҥ-влакын шарныктышышт воктеке пеледышым пыштат.
9 шагатлан Марий паркыште пушеҥгым шындаш тӱҥалыт. Кумылан-влак ушнен кертыт.
16 шагатлан М.Шкетан лӱмеш Марий калыкле драме театрыште поэт Валентин Колумбын шочмыжлан 90 ий теммылан пӧлеклалтше «Эре чоҥешташ, чоҥешташ!» концерт лиеш.
18 шагатлан С. Чавайн лӱмеш калыкле книгагудышто «Библиойӱд» сотемдарыме акций стартым налеш. Тудын темыже «Шкенан талешкына-влак» маналтеш, увертара «Марий Эл» газет.
Тыгак, Эстонийыштат Талешке кечым палемдат. «Таллинн марий ушем» Родо-тукым тӱвыра рӱдола дене пырля ты кечын Нарвыште Финн-угор спортла модмашым эртарат.
Программыште: волейбол, баскетбол, йолтоп, кандырам шупшын модмаш, калык мече да кидвурго дене кучедалмаш. Мероприятий Юрий Гордеевым шарныме лӱмеш эртаралтеш.
Рушла Telegram-ыште лудса /
По-русски читайте в Telegram:
https://t.me/mariuver/640
MariUver
йолтоп — футбол,
калык мече — эстонла rahvapall, рушла вышибалы
MariUver 