Вӱдшор тылзын 23-шо кечынже Ээсти мландыште Юрийын кечыжым – Jüripäev пайремлат. Черке кечышотышто тиде шнуй Георгийын колымо кечыж улеш. Эстон калык календарьыште ты кече кристан йӱла деч ойыртемалтеш, воза Faacebook мервотышто Rahvakalender.
Шнуй Георгий драконым пуштшо семын палыме улеш. Тидыже черкын чийӱлам (язычеством) сеҥымыжым ончыкта. Эстон-влак шнуй Юрийым утларакшым пире-влакым сорлыклышо таргылтыш гай ужыныт.
Калык кечышотышто Юрий кечын идалыкын кеҥеж ужашыже тӱҥалеш, вольыкым пасуш поктен лукмо да мланде паша тӱҥалме жап. Юрий тулотым ыштеныт, ю ой полшымо дене осал шӱлышым, эҥгекым да черым поктеныт. Уна-шамыч деч шекланеныт, арверым кӱсын пуаш лӱдыныт, вет арвер гоч локтылашат лиеш.
Пасу, вольык перкем йодыныт да калык палым эскереныт. Ты кече гыч тӱҥалын чара йолын кошташ да мландыште шинчаш лийын.
Чоҥештен толшо кайык-влак деч ончыч лӱдыныт, вет нуно вес тӱня гыч пӧртылыт манын ӱшаненыт. Кайык-влакын колымашым кондышо вийыштым айдеме деч нуным ондалыме да юмут йӧн дене кораҥдаш тыршеныт. Кайык тыйым садак ондален гын, тений, кукшо игече деч утлаш манын, пушеҥгым пурлаш кӱлеш. Тунам пушеҥге кошка, а шке от кошко.
Ты кечын пӧрт йыр чара йолын коштын савырне. У пашам кычалаш але пашадарым кугемдыкташ йӧнан жап. Тупрӱдӧ ынже коршто манын, вуй гоч тӧрштӧ. Юрийлан йыҥгырте! Иктаж сай верыш пырля кочкаш миен толза, мыскара йӧре ешара Rahvakalender.
Рушла Telegram-ыште лудса /
По-русски читайте в Telegram:
https://t.me/mariuver/635
MariUver
Rahvakalender-ын сӱретыштыже «пирылан — уке» ман возымо
MariUver 