Чатлама тылзын 18-ше кечынже Таллинн оласе Viru Keskus сату рӱдерыште Эстонийыште Тӱвыра поянлык идалыкым мучашлыме пайрем эртаралтын. Тушко тӱрлӧ калык-влакын еҥышт миеныт, нунын коклаште марий-влакат лийыныт.
Элын культур поянлыкшылан пӧлеклалтше пайрем ойыртемалтше шижмашым да куатле ум почмашым темлен. Программыште 12 шагат гыч 21 марте чылалан яра мероприятий-влак лийыныт. Эн кугужлан 14 гыч 16 шагат марте эртыше гала-концертым шотлаш лиеш.
Уна-влакым ола мучко экскурсий, музыкчо-влакын выступленийышт, калык костюм-влакым ончыктымаш, кидпаша мастар-класс-влак, куштымаш урок да тӱрлӧ элын кочкышыжым тамлен ончымаш вученыт.
«Таллинн марий ушемын» чолгаеҥже-влакат фестивальыште лийыныт. Кристин Тохт курыкмарий калык костюмым ончыктен. «Тау, Кристин! Кугу тау, Инга Погонина, тувыр да полшымылан!» — ойла ушем вуйверын еҥже Жанна Тохт.
Пайрем шӱлышым ыштымаште марий общинын вес еҥже-влакат полшеныт: Татьяна Гимаева, Валерий Гимаев, Наталья Лилль, Наталья Полянина марий тӱвыранам ончыктышо ӱстелым шаралтеныт.
Пайремлан ойыртемалтше тӱсым мурызо Анна Макеевын да кӱслезе Сакико Ишийын йоҥгалтарыме марий да япон муро да сем-влак пуртеныт.
Финалле пайрем Тӱвыра поянлык идалыклан чапле мучашым пыштен, Эстонийыште илыше тӱрлӧ калык-влакын йӱлаштын поянлык да моторлыкыштым ончыктен.
Анна ден Сакико йоҥгалтарыме видео-влакым «Таллинн Марий ушем\Tallinna Mari selts» тӱшкаште Facebook мервотышто ончыза.
Тыгак Delfi лаштыкыште рашрак эше лудын да фото-влакым ончен кертыда:
В Эстонии торжественно завершился Год богатства культур
Postimees газетыште:
Viru keskuse vallutas uhke kultuuririkkus
MariUver
Фото: Жанна Тохт, Инга Погонина да Delfi
MariUver 