Чатлама тылзын 10-шо кечынже Тарту олаште, Эстон сылнымут тоштерыште, марий тӱвыралан пӧлеклалтше кас эрта. Тушто Жанна Тохтын «Мо нерген марий тӱрлем ойла?» ончерже почылтеш. Тидын нерген сӱретче Facebook мервотышто палдара.
Мероприятий 16:30 шагатыште тӱҥалеш. Выставкым почмаш изи семинар семын лиеш. Тушто сӱрет-влакын темышт кӱчык доклад-влак полшымо дене кумданрак почылталтыт, тыгак Шорыкйол пайрем йӱла дене палдарат.
Кас радам:
- Жанна Тохт «Тӱр, пале да сӱретче илыш-йӱла тӱвыраште»;
- Наталья Лилль «Тӱрлымаш марий культурышто»;
- Людмила Ямурзина «Еш йӱла радам марий тӱвыраште»;
- Алексей Алексеевын «Чумбылат курык» фильмже гыч марий теле пайрем Шорыкйол йӱла нерген ужаш;
- «Тарту марий-влак ушем» парышдыме объединенийын «Марий кумыл» ансамбльжын выступленийже;
- Семинарыште Арво Валтонын кусарыме марий почеламут-влак эстонла йоҥгат;
- Мероприятий «Мыйын шке тӱрем» изи мастар-класс дене мучашлалтеш.
Мероприятийым «Таллинн марий ушем» ямдыла. Ончер пургыж тылзе мучаш марте почмо лиеш.
MariUver
мервот — соцсеть
илыш-йӱла тӱвыра — традиционный культур
MariUver 