Чатлама тылзын 3-шо кечыж гыч 10-шо марте Шорыкйол арня лиеш. Тидын нерген «Марий Эл» газет увертара.
Акрет йӱла
Эрден эрак уло еш дене пырля пасуш лектыныт да лум каваным ыштеныт. Вуйышкыжо уржа але шыдаҥ парча вуйым кералыныт, а южышт лум каван вуйыш мелнамат уреныт. Ты йӱла у ийыште сай шурно лектышлан полша манын ӱшаненыт.
Тыгак, емыж-саска сайын шочшо манын, пакчаштак кушшо саскам пуышо пушеҥге ден моло кушкылын укшлаштым рӱзеныт.
Гавриил Яковлевын «Религиозные обряды черемис» книгаштыже (1887 ий) серен кодымо почеш, ожно марий-влак Шорыкйолым уло ял дене палемденыт. Эн ончыч тӱр пӧрт гыч тӱҥалыныт, тушко погыненыт. А вара сурт еда каеныт, иктыжымат ойырен коден огытыл. Южо суртышто самырык рвезе-влакым шорык вӱташ колтеныт (шорыкшо тӱланыже, мужыр пачам кондыжо манын), вольыкын йолжым кучаш кӱлын.
Авторын ойлымыж почешак, южо вере Шорыкйол пайремым Ӱдырсий йӱла дене вашталтеныт. Пайрем деч ончыч вуешшушо ӱдыр-влак пӧрт еда полтым погеныт, да иквереш чумырген, сырам шолтеныт. Вара ты пӧртыштак пайремлан пырля погыненыт. Ял калыкат тушко миен. Ӱдыр-влак нуным сийленыт. А молышт муреныт да куштеныт. Сийлан толшо-влак шийвундым кучыктеныт.
Марий паркыште лиеш
7-ше чатламаште Йошкар-Оласе Марий паркыште Шорыкйол калык йӱла пайрем эрташ тӱҥалеш
Тудым республикысе Марий тӱвыра рӱдер Марий Элын Тӱвыра, савыктыш да калык-влакын пашашт шотышто министерствыжын полшымыж дене эртара.
Мероприятий 11 шагатлан тӱҥалеш. Ончыч пайрем вургемым чиен толшо тӱшка-влакын парадышт лиеш. Фольклор коллектив-влак шке усталыкыштым ончыктат. «Модыш алан» пашам ышташ тӱҥалеш. Лум каваным чумырымо акрет марий йӱлаш ушнаш лиеш.
Кугезына-влакын мужедме йӧнышт денат палдараш тӱҥалыт. Кумылан-влак маскайол, шӱшканъече денат коштын ончен кертыт.
Марий тӱвыра рӱдер пайремыш ушнаш кумылан-влакым вуча, воза «Марий Эл» газет.
MariUver
чатлама тылзе — январь
MariUver 