Никандр Попов
Никандр Попов MariUver лаштыкыштына тыгай комментарийым коден. Ме тудым посна статья семын савыктена.
Кызытсе нелылык ХVIII -XIX курымлаште тунемше кугезына-влакын йӧсланымышт дене таҥастарымаште «модыш» гае веле чучеш, очыни. Но кызытсе марий-влак Юмын пуымо пӧлекым, Юмын надыржым арален кодышаш верч огыт шоно. Шочмо йылме деч посна кодшо еҥым тичмаш айдеме манаш лиеш мо? Шочмо йылмым йомдарымеке, АЙДЕМЕ Юмын пуымо эн шерге шӱм-чон чӱчалтышыже деч посна кодеш. Тыгай тичмашлыкшым йомдарыше еҥ вес тӱняшке логалмекыже кузе вара Юмо ончыкыжо миен шогалеш, пеле айдемыш савырнымыже шотышто мом каласа. А кузе Юмо тыгай-влакым аклаш тӱҥалеш, мо нуным вес тӱняште вуча?
Айста «пеле айдеме» олмеш «тичмаш айдеме» лийшаш верч калыкым тарватена. Вет улыт мемнан мер организаций, объединений, национально-культурный автономий, религиозный общине-влак. Айста нунын лӱм дене РФ Совет Федерацийыш, Госдумыш, республикысе парламентыш йодмаш-влакым колтылаш тӱҥалына.
Чанжымак, вет Йошкар-Олаште йоча садлаште да школлаште марла туныктымым чарненыт манаш лиеш. Ача-ава-влакым аҥыртарен, кунамже изишак йӱкшыктарен але лӱдыктылын йочаштым рушыш савыраш тыршат, марий йылме урокым школласе расписаний гыч кораҥдылыт, посна группо-влакым петыреныт. Йоча садлаштат марла туныктымаш йомын толеш. Марий туныктышо, воспитатель-влакым ямдылымаш паша чылт мӧҥгештын манаш лиеш: университетыште, педучилищыште специалист-влакым огыт ямдыле.
Тыгеже мемнам, марий-влакым, калык семын пытарынешт. Таче уло вийым пыштен, кыртменак Шочмо йылмынам арален кодышаш верч огына пиж гын, ме марий-влак йомына. Сандене ӱжам чыладамат: айста рӱж пижына шкенан ончыклыкнам арален кодымо пашашке!!! Юмо полшыжо мыланна, кажныжым суапле пашашке ушыжо, вий-куатдам кугемдыже, мастарлыкдам ешарыже. Помыжалтса марий-влак, нерен ида шинче, ылыжалтса да пелен улшо йолташда-влакымат поро кумыл дене ылыжтыза.
Никандр Попов
MariUver 