Эрзя, мокша да марий сылнымут кыл пеҥгыдемеш

Пытартыш жапыште Мордовий да Марий Эл тӱп калык-влакын литературышт коклаште вашкыл изиш саемын. Эрзя да мокша йылмыла гыч почеламут-влак марлаш кусаралтыт да мӧҥгешла.

Шукерте огыл Саранскыште Мордовийын сулло поэтше Геннадий Гребенцовын марий йылме дене лекше «Лум шӱдыр» («Ловонь тяштенят») ойпогыжын презентацийже эртен. Йоча-влаклан пӧлеклалтше почеламут-влакым поэт, «Ончыко» журналын тӱҥ редакторжо Игорь Попов кусарен. Тудын дечын сылнымут пайрем нерген кумданрак каласкалаш «Марий Эл» газет йодын.

– Самырык серызе да книгам лукшо-влак дене этновашлиймаш Пушкин лӱмеш калыкле книгагудышто эртаралтын. Марий да эрзя-мокша писатель-влак коклаште кыл ийла дене пеҥгыдем толын, тиде сай йӱлам кызытат кучаш тыршена. Мутлан, эрзя поэт Геннадий Гребенцовын, мокша Рая Орлован почеламутышт-влакым, кусарен, шукерте огыл «Ончыко» журналыште савыктышна. Эрзя йылме дене лекше «Чилисема» йоча журналыштын пытартыш номерыштыже Светлана Архипован, Анатолий Тимиркаевын, Геннадий Оярын, Юрий Соловьевын да мыйын произведенийна-влак нунын йылмышкышт кусаралтын печатлалтыныт.

«Мордовийын этнокультур поянлыкше» секцийыште сылнымут кыл, марий литературышто да книга савыктыш пашаште мо ышталтме нерген палдаренам. «Кугарня» газет редакцийын пашаеҥже Татьяна Попова тӱрлӧ изданийын журналистышт дене вашлийын мутланен, – лие раш вашмут.

Йошкар-Оласе 30-шо №-ан «Берёзка» йочасадыш коштшо Дарья Попова «Лум шӱдыр» книга гыч почеламутым марла да рушла лудын пуэн. Тылеч посна 2-шо №-ан школын тунемшыже-влак ты авторынак сылнымутшым видеойӧн дене йоҥгалтарымышт дене куандареныт, туныктышышт Людмила Алексеевалан таум ойлыман, палемдыш Игорь Попов, воза «Марий Эл» газет.