Марий самырык-влак Курыкмарий кундемыш чумыргат

Шырка тылзын 16–20-шо кечылаштыже Марий Эл Курыкмарий район Микрӓк селаште XVI Россий кӱкшытан марий самырыктукым слёт лиеш. Тений тудо Еш идалык кышкарыште эртаралтеш, увертара Мер каҥаш «КонтактЫште» мервотышто.

Участник-влакын ийготыштышт 18 гыч 35 ий марте лийшаш.

Слётын ик эн тӱҥ шонымашыже – марий самырык тукым коклаште ончыко вӱден кайыше еҥым кушташ, мер илышыш ушаш.

Кажне ийын слёт ойыртемалтеш: тӱрлӧ районышто эрта, тудым ямдылыме пашашке вес еҥ-влак ушнат, пайдале туныктымо, тӱвыра да каныме программе ямдылалтеш.

Слётым ямдылыме да эртарен колтымо йодыш-влакым илышыш пуртымо верч Марий Эл Республикын тӱвыра, печать да калык-влакын пашашт шотышто министерстве, Самырык-влак политике комитет, Мер каҥаш, «Социал инициативе рӱдер», «Эр Вий» ден «ВийАр» мер ушем-влак тыршат.

Тений Россий кӱкшытан марий самырыктукым слётын участникше лийнет – 1 июль марте тиде электрон адресыш анкетым колтен кертат:  mer-kanash@mail.ru

MariUver