Книга финн-угор-влак деке коштмо нерген ойла

Ӱмаште, 2023 ийыште, Эстон калык тоштер (ЭКТ) Индрек Йӓӓтсын «Элдӱр мучко корнымгоштшо. Финн-угор кундемлаш миен коштмо нерген каласкалымаш» — Ääremaadel kõndija. Reisikirjeldusi soome-ugri aladelt книгам луктын. Тудо шымлызын родо-тукым калыкна-влак деке коштмыж нерген каласкала.

Савыктышыш 2010-2017 ийлаште ЭКТ пашаеҥ-влакын шым экспедицийыш коштмышт нерген ойлалтеш. Автор Индрек Йӓӓтс (Indrek Jääts) шкеже этнолог улеш да тоштерыште пашам ышта.

Эн ончыч ме пермь коми-влак деке логалына. Вара эрвел Латвийыш куснена да ужына, мо лийын тушто илыше лудза эстон-влак дене. Книгаште тӱҥжым Вепс мландыш коштмо нерген ойлалтеш. Но тыгак Карелийышкат миен толына, да мучашлан Одыэлыш шуына.

Коштмо годым тӱрлӧ йӧсылык лекмаш, верысе калык, тӧра да коллеге-влак дене вашлиймаш, фотосӱрет-влак — чыла тиде ончыкта, кузе нине кундемлаште калык ила, могай тудын ончыкылыкшо.

Теле тылзын 8-ше кечынже ЭКТ-ыште книга дене палдареныт. Фольклорзо Мадис Арукаськ (Madis Arukask) автор дене мутланен, воза ЭКТ.

MariUver

Фото: Postimees, ЭКТ

элдӱр — окраина
корнымгоштшо — путешественник
фольклорзо — фольклорист
Одыэл — Удмуртий