Теле тылзын 3-шо кечынже Тартун Ратуша рӱдӧ кумдыкыштыжo Рошто изолам официаллын почыныт да пайрем кожым чӱктеныт. Тыгак коньки дене мунчалтыме вер пашам ышташ тӱҥалын.
Мероприятий 17 шагатлан тӱҥалын. Калык площадь тич лийын. Пайремым почаш олан мерже Урмас Клаас ден Эстон евангелий лютеран черкын тартусо пробстшо Кристьян Лухаметс толыныт ыле.
Адвент сортам чӱктымӧ годым тыгак волгалтарымашым кучылт шындыме «Мый ужам…» спектакльым ончыктеныт. Ратушан шагатан пырджвуйжо тӱрлӧ сӱретым кучылтын шкенжын илыш корныжым каласкален: мом тудо ужын да колын.
Мучашлан уло площадьыште да рошто кожышто сӧрастарыше тул чӱкталтын. Кумылан-влак пеленышт Адвент тулым наҥгаеныт.
Тыгак ратуша полат ончылно катокым почыныт.
Рошто кумдык 7 январь марте почмо лиеш, коньки ден мунчалтыме верже – 3-шо март марте.
Мо тыгай Адвент
Адвент мут латин йылме гыч толын adventus «толмаш» манмым ончыкта. Католик да лютеран черкылаште тиде Роштом вучымо жап. Чылаже ныл Адвент лиеш.
Икымше Адвент Рошто деч ончычсо нылымше рушарнялан логалеш. Тений тиде – 3 декабрь. Вара вес рушарнян кокымшо Адвент да т.м.
MariUver
Фото ден видео: MariUver
кумдык — площадь
изола — городок
официаллын — официально
пырдыжвуй — башне
MariUver 