Эстонийыште марий-влак дене палдарат

242295543_453041052578399_7821898593203766926_n

Шукерте огыл Таллинныште ала-мыняр вере родо-тукым элыштына илыше чолга марий-влак калыкна дене палдареныт.

Рушла возенам ыле, Эстонийыште шыжа тылзын 18-ше числаж гыч 26-шо марте Эстоний калык-влакын кечышт-влак эртат. Нунын кышкарыште эртыше шуматкечын да рушарнян Таллиннын рӱдыштыжӧ — Ратуша кумдыкышто этноярмиҥга эртен. Тушто марий палаткат лийын.

Тыгак шуматкечын пайрем сценыште «Таллинн марий ушемын» ансамбльже выступатлен.

Эрлашыжым, рушарнян, «Тарту марий-влак ушемын» еҥышт-влак мурен-куштеныт.

Марий тӱр ончер

Тыгак рушарнян, 19 сентябрьыште, Таллинн Туныктышо-влак пӧртыштӧ Elu ilu, ilu elu (Илыш — моторлык, моторлык — илыш) марий тӱр ончер эртен. Тудым Наталья Лилль чумырен шаралтен. Эше Наталья марий тӱр мастар-классым эртарен.

Финалыш лектын

Марий мурызо Анна Макеев (Мишина) Эстонийысе ANNETEKODA 2021 талант-влак конкурс-фестиваль финалыш логалын. Таҥасымаш ий мучко Эстонийын тӱрлӧ кундемлаштыже эртен. Вара 24 эн сай участникым иктешлыше концертыш ойырен налыныт.

Финал Таллинныште рушарнян кастеным Alexela концерт пӧртыштӧ лийын. Анналан гармоньым одо Павел Кутергин шоктен.