Пагалыме марий ӱдырамаш-влак! «Марий ушем» МРОО-н вуйверже тендам уло кумылын 8 Март пайрем дене саламла.
Тиде шошо шӱлышан сылне кечылаште эн лыжга да шӱм-чон гыч шолын лекше мут-влакым тыланда пӧлеклаш моткочак куштылго. Пӱртӱс шкежак пуйто пылышышке шыве-шыве шыма мут-влакым ойла. Но ме, пӧръеҥ-влак, ала-молан шкенам сорлыклен кучена да чылаж годым огыл чапле шомакым луктын ойлена. Тидлан вуеш ида нал.
Тек Тыгыде Морко ял гыч Инна Сергеевна Николаеван тиде кече вашеш чон гыч луктын ойлымыжо тендам ынже ӧрыктаре. Тудын йомартлын йоҥгалтше саламлымаш шомакше гоч мемнан деч, пӧръеҥ-влак деч, саламлымашнам поро кумылын вашлийза.
Пайрем дене чыландамат!
Да тек йоҥгалтеш Инна Николаеван тыланыме мутшо:
Ӱдырамаш нерген таҥастарымем тыгайрак лиеш.
Тый – ӱдырамаш, ава, шӱдыр, ӱдыр йолташ, йӧратыме вате.
Тый – Кече, Мланде. Тый – тӱня, поран.
Тый – ӱшанна. Тый – кож. Тый – шошо.
Тый – пиал, а пиал йымыктара. Тый – лай вӱчкалтыш.
Тый – пеледыш. Уке, уке – пеледыш гычын ыштыме кидшер.
Тый – шупшалалтме там. Тый – тулшол шинчаончалтыш.
Тый – олык омо, яндар шӱлыш. Тый – куэвӱд. Тый – писе кеҥеж йӱр. Волгенче – тый, пустыньын шокшо, мардеж дене тайналтше шудо.
Тый – йӱштӧ лум леведыш. Тый – йӱд ден кече.
Тый – Юмын ужашыже, Юмынава. Тый – пӱрымаш кыша.
Тый – курымаш йӧратымаш. Тый – воштончыш, шӧртньӧ чашке мӱй.
Тый – кочо арымшудо да йӱр чӱчалтыш дене ыштыме бальзам.
Тый – тылзе, шӱдыр, шурнысавыш.
Тый – волгыдо да канде-канде кава.
Тый – ныжыл шыргыжме. Тый – тӱтыра.
Тый – йӱштӧ теле кас, лупшалтше толкын.
Тый – тамле вашлиймаш дечын вара ойырлымаш, куан да
ойго да шӱлык муро. Кугу корем улат тый, тӱтан.
Тый – чон ласкалык, муро. Тый – олмапу пеледыш, тамле-тамле.
Тый ӱмыреш, а можыч, изишлан, толынат тый илышыш
моторлыкым пурташ.
Тый – ӱдырамаш, ава, тый – вате, йӧратыме озавате,
шӱжар да йолташ, сандалык, орлык.
Тый – орлык. Тый – ӱдырамаш.
Тый – ӱдырамаш, тый – чын, тый – вий, Юмын пуымо моторлык.
Эше ик гана пайремда дене!
Игорь Кудрявцев
MariUver 