Эстонийын рӱдолаштыже идым тылзын 19-ше кечыж гыч тӱҥалын 27-ше числаж марте Калыкле тӱвыра-влакын кечышт эртат. Нунын кышкарыште верысе марий-влак калыкна денат палдарат.
1988 ий 24 сентябрьыште Эстоний калык-влакын икымше форумышт эртен да ты кечынак Эстоний калык-влакын ассоциацийыштлан (ЭКА) негызым пыштыме. Садлан кажне ий идым тылзын кокымшо пелыштыже Изи калык-влакын кечыштым эртарат.
Теният ты шуматкечын да рушарнян Таллинн олан Ратуша кумдыкыштыжо этноярмиҥга эрта. Тушто ЭКА-ш пурышо калыкле ушем-влак шке палаткыштым почыт. Нуно шке тӱвырашт дене палдарат, тӱрлӧ кидпаша арверым, книгам, калык кочкышым да молымат темлат.
Ярмиҥга 10 шагат эр гыч 18 ш. марте эрта. Пазар жапыште сценыште тӱрлӧ мер ушем-влак шке мастарлыкыштым ончыктат. Тыге Таллинн марий ушем шке концерт программыжым шуматкечын 10:30 ончыкта. Тарту марий-влак ушем — рушарнян 12:00.
Рӱдолан марий организацийже шуматкечын эше шке марий палаткыжым шаралта.
Кече-влак кышкарыште этнологий доктор Людмила Ямурзинан «Эрвел марий ӱдырамаш да тудын тӱняже» фотоончерым ужаш лиеш. Тудо Таллинн калык университетыште идым тылзын 18-ше кечынже 18 ш. почылтеш.
25-ше сентябрьыште Яак Прозес Российыште илыше финн-угор калык-влак дене палдара.
Тыгак нине кечылаште шуко моло калыкынат ола мучко тӱрлӧ мероприятийышт эрта.
Тӱрыс программым рушла тыште ончен кертыда (pdf).
MariUver
MariUver 