Пошкырт марий-влак у мер ушемым ыштынешт

Сорла тылзын 21-ше кечынже Башкортостан Республикын Келшымаш пӧртыштыжӧ ты кундемысе марий калыкле-тӱвыра автономий-влакын чолгаеҥышт-влак погыненыт.

Чылаже индеш район гыч: Мишкан, Караидель, Калтаса, Краснокамск, Янаул, Пӱрӧ, Благовещенск, Балтач, Дӧртыльӧ да Нефтекамск ола гыч марий-влак миеныт. Ӱпӧ ола ден Шараҥ районын представительже-влак «Zoоm» вот-системе полшымо дене ушненыт.

Вашлиймашым Краснокамск районысо автономийын председательже Раисия Сатаева вӱден. Тӱҥ докладым Балтач район гыч чолгаеҥ Риф Апляев ыштен. Каҥашымаш регионысо «Эрвел марий» НКО-н пашажым чарыме да у мер ушемым ыштыме шотышто каен.

Погынышо-влакын шонымышт почеш, у организаций марий калык илыман чыла районым авалтышаш. Лач тыгай пунчалым погынымаште пеҥгыдемденыт да оргкомитетым палемденыт. Тушко А.Умурбаев, Р.Апляев, А.Гайсин, В.Байбулатов, Г.Диндарьянова, Д.Ибашев, А.Минлин, А.Камилянов, Р.Сатаева, И.Тимиряева да П.Абдулов пуреныт. Оргкомитет председательлан В.Байбулатовым палемденыт. Тудын заседанийжым сентябрьыште эртараш пунчалыныт, воза «Марий Эл» газет.

MariUver