Эстонийын рӱдолаштыже Родо-тукым кечыла кышкарыште «Сылнымут вӱргече: Финн-угор почеламут кас. Поэзий да сылнысем» мероприятийыште Раисия Сунгурова шке почеламутшо-влакым лудеш. Кас Эстон серызе ушемын полатыштыже шыжа тылзын 30-шо кечынже эртен.
Эстон йылмыш Р.Сунгурован почеламутшо-влакым Арво Валтон кусарен да лудеш.
Пушеҥге лийын шочына
Чодырасе калык пуыш савырна.
Шем теҥыз сур асфальт докан лиеш.
Кунам чонна пырляште трук ярна,
тунам капнат чаманыде шӱеш.
А ӱмана, вожаҥын, йышт ушнат, —
бетон коклам эртен ме шочына
пушеҥге лийын. Йыгыре тачат.
Изи куэ-влак йыр – ош шочшына.
Аза кочкеш чизим
Тӱня шога. –
Аза кочкеш чизим.
Чылан шога:
ок ыште магазин,
шагат ок кошт,
шогалын машина.
Иктат ок тошт
ты татын шӱлалташ.
Чылан палат,
аза кочкеш чизим.
Пуйто малат
йышт эскерат изим.
Огеш йӱр йӱр,
пеледыш ок пелед.
Мардеж ок кӱр –
кеча пестеште плед.
Лач мый тӱня
азамлан. Ош чизим
воктек турня
конден пыштен изим.
Ю вӱд лиеш
Ош шӧржӧ тылат тек,
эр-кас иеш,
суксемже пеленет.
Йыр пӧрдеш руштшо лум…
Йыр пӧрдеш руштшо лум,
а мый йӱр ден шортам.
Олтынем – ночко пу.
Шикш олмеш лач киш там.
Ынже йӱлӧ ынде
чоныштет юзо тул.
Ойырлен кайыде,
тыланетше ом кӱл.
Ош сорта шып ора,
шиште вӱрым локтен,
Лач ок кошко, йора,
мо чонем сусыртен.
Лум шула да шӧрла
киш пуш дене айнен,
а йӱрем шӱртыла
кӱнчылаш чумырген.
MariUver
Фото да видео: MariUver
MariUver 