Шочмо мландын сем куатше

«Умбалне Элнет ӱмбал канде»
муро, поэзий, куштымаш VIII Фестиваль

2019 ий 3 августышто Волжский район Руш Шайра (Шарибоксад) да Курыкйымал ял коклаште, Мӱшыл (Морской глаз) ер воктене – Муро, поэзий, куштымаш VIII Фестиваль.

Ты кугу мероприятийым марий мер пашаеҥ-влак, Юлсер кундем муниципальный образованийын администрацийже, районысо тӱвыра пӧлка иквереш эртарат. Пайрем республик кӱкшытан.

Фестиваль 13.00 шагатлан пайремлын почылтеш да тыгайрак программе дене эрта:
– Композитор Василий Очетовлан 100 ий, Волжский районлан 80 ий темме лӱмгече дене Йошкар-Ола гыч толшо вуйлатыше-влакын, районысо-вуйлатыше-влакын, верысе кучем вуйлатыше-влакын, лӱмлӧ еҥ-влакын официальный саламлымашышт;
– Йошкар-Ола, республикысе тӱрлӧ район гыч толшо мурызо да куштызо, поэт, артист-влакын усталыкышт;
– Юлсер (Волжский) районеш шочын-кушшо лӱмлӧ еҥ-влак дене палдарымаш (100 ий ончычсо марий просветитель, кугун чапланыше поэт, писатель, генерал, тӱрлӧ военный, тӱня мучко кумдан палыме юлсер марий-влак);
– Родо-тукым дене вашлийын, чон почын мутланымаш;
– Юлсер кундемым XXI курымышто калыкмарий дене тӧр лийме шотышто йодышым каҥашымаш да ончыкылык корным палемдымаш;
– Юлсер кундемын краевед тоштержым ыштыме йодышым калык дене каҥашымаш.

Чыла тидыже «Умбалне Элнет ӱмбал канде» муро, поэзий, куштымаш фестиваль кышкарыш пура да тений ынде кандашымше гана эртаралтеш.

Ты гана композитор, музыкант, туныктышо, Кугу Ачамланде сарым геройлын эртыше Василий Очетовын шочмыжлан 100 ий теммылан пӧлеклалтеш да Волжский районын шочмыжлан 80 ий темме пайрем кышкарыште эрта.

Ты пайрем тыгак Сотнур волостьын ышталтмыжлан 300 ий темме денат кылдалтын.

Тений фестивальыште профессионал мурызо-влак утларак лийыт. Верысе калык эн чотшо Юлсер кундемын шочшыжо-влакым, опер мурызо Олег Логиновым, эстраде мурызо Раисия Даниловам, Володя Матвеевым, уна-влакым – тӱня мучко палыме да аклыме флейтист Виталий Шапкиным, опер мурызо, тале марий айдеме Вячеслав Созоновым – да шуко молымат вучат.

Пайремым тыгак Василий Очетовын ятыр тунемшыже-влак, Юлсер кундемын пагалыме да йӧратыме самодеятельный мурызыжо-влак сӧрастараш полшат.

Посна ужаш семын Элнет–Юлсер кундемысе историй поянлыкым чумырымо йодышлан вер ойыралтеш.

Фестивальым тӱшкан мурен-куштымаш мучашла.