2019-ше ийым Театрын идалыкше семын увертарыме. Сандене тидым шотыш налын, Марий радиошто 1956-шо ий гычак аралалтше радиоспекталь-влакым Марий Эл КТРК интернетыш лукташ тӱҥалын. Тошто спектакль-влакым фондышто кодаш манын, шке жапыштыже йӱк режиссёр, Марий Элын сулло артистше Дмитрий Отмахов, фонотекарь, Марий Эл культурын сулло пашаеҥже Мария Порханова, йӱк оператор Вера Дружинина кугу пашам шуктеныт.
«Кенеж йӱд» радиоспектакль
Республикынан Калык писательже Николай Арбанын ӱмыржӧ пӱтынек марий театр дене кылдалтын. Чапле сӱретче, данле семмастар, лывырге куштызо да – эн тӱҥжӧ — кугу мут юзо, тудо пел курым утла марий калыкын шӱмжым модыктен, шортарен, шодо кошкымешке воштылтен.
«Кенеж йӱд» сылнысеман комедийым Марий радион кугу студийыштыже 1960-шо ийыште возымо. Тӱҥ рольым палыме артист-влак Мария Сапожникова — Ольга, Виктор Бурлаков – Санюк, Георгий Пушкин – Марка кум, Владимир Зернов — Алгаев, Анастасия Страусова — Ведасий да молат модыт. Тыгеже тиде спектакль икымше марий опереттылан шотлалтеш. Семым композитор Лев Сахаров келыштарен. Режиссержо – Россий сымыктышын сулло пашаеҥже Сергей Иванов.
Икманаш, спектакль сар деч вара ял илышым уэмдыме нерген. Тыште чылажат ончышылан лишыл да сымыстарыше — весела мыскаражат, музыкыжат, кумылло куштымашыжат. «Кеҥеж йӱд» музыкле комедий Марий радион «шӧртньӧ» фондыштыжо аралалтеш. Колыштшо-влакын йодмышт почеш чӱчкыдынак эфирыште йоҥгалтеш да ончыкыжымат шергылташ тӱҥалеш…
«Салика» радиоспектакль
«Салика» сылнысеман комедийым Марий радион кугу студийыштыже 1960 ийыште возымо. Тудын авторжо калык писатель, кумдан палыме драматург, Сергей Николаевич Николаев. Тыште пеш палыме да пагалыме артист-влак Тимофей Григорьев (Ози Кузи), Анастасия Тихонова (Салика), Виктор Бурлаков(Эчук), Владимир Зернов (Чопай), Майя Романова (Марина), Иван Матвеев (Полат Акпай), Анастасия Страусова (Эчан вате), Илья Россыгин (Терей) да молат модыт. Режиссёр – Россий сымыктышын сулло деятельже Сергей Иванович Иванов.
«Салика» спектакльыште революций деч ожнысо тулык ӱдырын неле да йӧсӧ илышыжым ончыктымо, тыгак самырык-влакын поян-шамыч ваштареш, эрык верч кредалмыштлан кугу верым ойырымо. Икманаш, «Салика» кок тулык рвезе еҥын — Ипат Эчук ден ашнаш налме Саликан-йӧратымышт да нунын сай илыш верч кучедалмышт нерген музыкле, тыгак марий калыкын пайремжым, койыш-шоктышыжым, тудын поян мутсаскажым ончыктышо спектакль.
«Салика» спектакль Марий радион «шӧртньӧ фондыштыжо» аралалтеш. Але марте тудо эфирыште 600 наре гана йоҥгалтын да радиом колыштшо-влакын йодмышт почеш кызытат шергылтеш да воштылаш тарата, шинчавӱдым луктеш, кумылым нӧлта.
Сергей Николаевын «Салика» спектакльлан монтажым 1960 ийыште ыштеныт.
Ози Кузи — РСФСР-ын сулло артистше Тимофей Григорьев
Кузи вате — РСФСР-ын сулло артистше Мария Михайлова
Салика — РСФСР-ын сулло артистше Анастасия Тихонова
Эчук — РСФСР-ын калык артистше Виктор Бурлаков
Чопай — МАССР-ын сулло артистше Владимир Зернов
Марина — РСФСР-ын сулло артистше Майя Романова
Полат Акпай — РСФСР-ын сулло артистше Иван Матвеев
Эчан вате — РСФСР-ын сулло артистше Анастасия Страусова
Сармаев, урядник — РСФСР-ын сулло артистше Иван Якаев
Терей — МАССР-ын калык артистше Илья Россыгин
Терей вате — МАССР-ын калык артистше Елена Сошникова
Онтон Савуш — МАССР-ын калык артистше Иван Никитин
Шужышо каче — МАССР-ын сулло артистше Андрей Кудрявцев
Тулар марий — артист Николай Иванов
Ик ӱдыр — МАССР-ын сулло артистше Любовь Булычева
Вес ӱдыр — МАССР-ын калык артистше Мария Сапожникова
Налмывер: Марий Эл КТРК
MariUver 
Уведомление: Марийские радиоспектакли выкладывают в интернет | MariUver
Шукертсек ыштышаш паша. А кунам марлашке кусарыме художественный фильм-влак лийыт? Вучен шукташ у’шан уло мо?