Таче шочмо марий йылмына шортеш

Тудым ме утарышаш улына

Марий йылмым туныктышо-влаклан,
Марий йылме верч чот шогышо-влаклан,
Марий ача-ава-влаклан,
Шочмо марий йылмынам арален кодаш тыршыше кажне марий еҥлан

Пагалыме марий айдеме!

Тений 30 январьыште «Марий ушем» мер организаций шочмо марий йылмынам арален кодымо йодышлан пӧлеклалтше «йыргешке ӱстелым» эртарыш. Тиде уверым колында, йодышым каҥашенда, шонена.

Кандашлу утла еҥ погынен. Шагатат пелыште ончышаш йодышна вич шагатат пеле шуйныш, садыгак чоным корштарыше йодышым каҥашен ышна пытаре. Южыжо еҥже ойлен шуктыде кодо, туге гынат мероприятий шукыштлан келшен. Калык-влакын тӱвыраштым шымлыше ик руш айдеме, тале мер активист тыге каласыш: «Это было мероприятие первостепенной важности для народа мари по проблемам языка, и это случилось впервые за последние семнадцать лет».

Раш, тиде йодыш марий калыкым моткоч тургыжландара. Йылме ила — калык ила. Кызытсе саманыште Шочмо йылме деч посна айдеме чон деч посна илымыла чучеш. Чумыр кугезе вий-куатым марий калык Шочмо йылме гоч налеш. Тыгакак Шочмо йылмына – осал деч кугу аралтыш.

«Марий ушемыш» ятыр тургыжланыше увер пура. Мутлан, пытартыш 16 ий жапыште школлаште марий йылмым тунемме ваштареш кугу агитаций каен, шонен лукмо чарак-влак лектеденыт. Чаманаш логалеш, тиде процесс кызытат шуйна. Ятыр школлаште директор-влак ача-ава-влакым марий йылмым туныктышо деч посна погат, руш манмыла, «соответствующий» кутырымашым эртарат. Ача-ава-влак йылме тунемме программым ситышын огытат пале, умылтарымаш пашам нунын дене нигӧ огеш эртаре. Кажне школ кузе кертеш, туге тиде йодышым умылтара, радам шотет пудырген. Тыгакак кажне тӧра тиде йодышым кузе кертеш, туге пӱтыркала. Но йылмынам туныктымашым арален кодман!

Школлаште да туныктымо пашаште экшык пеш шуко. Южо маровед, паша деч посна кодаш огыл манын (вес тӱрлӧ амалат шагал огыл), шочмо марий йылмына ваштареш виктаралтше уда пашан озаланымыжым луктын каласаш лӱдыт. А тидыже школын чапшым да лӱмжым волта

Ситуацийым тӧрлаш да марий йылмым тунемме да туныктымо сомылым кӱлеш кӱкшытыш нӧлталаш манын, ме, «Марий ушемын» еҥже-влак, тыгай йодмаш дене лектына: шкендан шонымашдам, тыланымашдам, школлаште мо чынже денак ышталтеш, кӧргӧ могыр гыч чын сӱретым рашемден пуаш. Тиде иктешлымаш материалдам тыгай электрон адресыш колташ йодына: mariushem@mail.ru Материал пелен шке лӱмнердам ончыктеда гынат лиеш, огыда ончыкто гынат лиеш, псевдоним гочат лиеш. Икманаш, кузе Те шкеже кӱлешлан шотледа. Тыгак «Марий ушемыш» толын, тиде йодышым лончылаш, виктараш полшаш лиеш. Адресна: Йошкар-Ола, Ленин проспект, 38. 201 пӧлем.

Республикысе марий йылме йодыш ситуацийым «Марий ушем» келгын шымла, чыла могыржымат пален налын, келге иктешлымашым ышташ пижын. Садлан, пагалыме марий калык, тендан полышда мыланна моткочак кӱлеш. Таче Шочмо Марий Йылмына шортеш. Ме утарышаш улына. Пырля ме кеч-могай осалым сеҥена!

Пагалымаш дене,
«Марий ушем» вуйвер (правлений)
14.02.2018 ий

P.S.
1) Возен колтымо годым ваш-ваш лавырам кышкаш огыл манын йодына, лудмо годым кумылым волта;
2) «Марий ушем» активист-влакым чыла вере, чыла йӧным кучылтын, тиде уверым увероҥалашке шаркалаш йодына.

Фото: 7×7