Кодшо шуматкечын Тартушто эстон чийӱлам кучышо-влакын ик эн кугу мероприятийышт эртен. Тушто фотоконкурсымат иктешленыт. Ик номинацийыште марий еҥ сеҥен.
«Кӱсотын куатшым жаплымаш» мероприятийым эстон чийӱлам кучышо-влак кажне ийын эртарат. Тудо шкешотан эртыше ийым иктешлыше пайремле событий.
Р.Маран покшелне
Кажне ийын «Кӱсотын йолташыжым» ойырат. Тений тиде чаплӱмым кинорежиссёр, оператор Рейн Маран сулен налын. Тыге тудын пытартыш кум киножым палемденыт: 2013 ийыште войзымо «Hiite lummus» (Кӱсотын ямже), «Looduslikud pühapaigad Eestis» (Эстонийын пӱртӱс шнуй верже-влак) да тений лукмо «Suvisted Tammealusel» (Лышташ пайрем Таммеалус кӱсотышто). «Кӱсотын йолташыжлан» мотор товарым пуат да ӱштым ӱшталтат.
Тыгак мероприятий годым «Шнуй пӱртӱс вер-влак» фотоконкурсышто сеҥыше-влакым палемденыт. Тений тӱҥ премийым, 1000 евром, Мартин Марклан кучыктеныт. Тудо Урвасте кундемыште шоҥго, кӱдыратле Тамме-Лаури тумым пеш мотор татыште войзен шуктен: шеҥгелне каваште Кайыккомбо кашта коеш. Фотосӱретшым «Пеш шоҥго да туддеч шоҥгырак» ман лӱмден.
«Родо-тукым калык-влакын шнуй верышт» премий, 300 евром, Ольга Чичиркон «Нумто ер. Чонло вӱд» фотосӱретшылан пуеныт. Нумто ер хант да чодыра ненец-влакын шнуй верыштлан шотлалтеш.
«Кӱсотын ойгыжо» номинацийыште Угарман кундем гыч марий чолгаеҥ Юрий Юсуповын «Шнуй вер» фотосӱретше премийым сулен налын. Тушто Тоншай кундем Одошнур ялыште улшо часамлам ончыктымо. Часамла покшелне чимарий-влакын шнуй пистышт деч кодшо ужаш.
Тыгак Россий финн-угор-влак кокла гыч эрзя Эдуард Ретунскийын фотожо «Йӱла» категорийыште сеҥен.
Самырык да йоча-влаклан посна премий, 200 евро, Сааремаа отро гыч Бригитте Михкельсонлан логалын.
Моло премийым налше фото-влакым тыште ончен кертыда >>
Ушештарена 2013 ийысе тӱҥ премийым марий Сергей Таныгинлан пуеныт, тунам родо-тукым калык-влаклан посна премий лийын огыл. Ӱмаште фотоконкурсышто вес марийым, Иван Богомоловым, «Кӱсотын ойгыжо» ужашыште палемденыт.
Конкурсыш фотосӱрет-влак Эстоний деч посна эше латик эл гыч пуреныт.
Вот тыгерак Эстонийыште пӱртӱс юмым жаплыше-влакын тӱҥ мероприятийышт эртен каен.
Мероприятий гыч фотосӱрет-влакым Фейсбукышто ончыза >>
Maavalla Koda-н материалже негызеш
MariUver
Мероприятий гыч фотом Мана Каасик ыштен, нуным Фейсбук гыч налме
MariUver 
Юрий Юсуповым саламлена!