Ригыште марий да моло финн-угор калык-влак дене палдареныт

"Марий кумыл" ансамбль Ригыште марла кушта. Фото: Aldis Jonikāns.

«Марий кумыл» ансамбль Ригыште кушта. Фото: Aldis Jonikāns.

4-ше октябрьыште Латвийын рӱдолаштыже Финн-угор калык-влак кече эртыш. Тушто марий-влакат лийыныт.

Латвийыште Родо-тукым кечым тыге кумдан да тыгай кӱкшӧ кӱкшытыштӧ, векат, икымше гана палемденыт. Мероприятий-влак 12 шагат гыч тӱҥалын кандаш шагат кас марте шуйненыт. Пайрем Ригысе Латыш ушемын чапле полатыштыже эртен.

Родо-тукым кечым почмаште Эстонийын, Финляндийын да Венгрийын посолышт-влак, Латвий да Эстоний культур министерстве гыч кӱкшӧ уна-влак, Эстон Родо-тукым программым вуйлатыше ойленыт. Латвийыште лив родо-тукым калык тӱп калык улеш, садлан нунылан тиде пайрем поснак кӱлешан да шерге лийын.

Финн-угор калык-влак дене кӱчыкын Фенно-Угрийын каҥашеҥже Йаак Прозес каласкален пуэн, Балтий теҥыз воктен илыше родына-влак нерген Фенно-Угрийым вуйлатыше — Кади Раудалайнен.

Кечывал каныш жапыште финн-угор калык-влакын кочкышыштым тамлен ончаш лийын. Туддеч вара конференций сынан ужашыште кӱчык доклад-влакым лив, коми, эрзя-мокша, одо, венгр, сето-влак нерген колышташ йӧн лийын.

Мария Корепанова йӱдвел одо калык мурым мура:

Николай Анисимов — кечывалвел одо мурым:

Сето муро:

Марий-влак нерген Васли Николаев каласкален, Татьяна Албахтина да Тарту марий ӱдыр-влак марий вургем дене палдареныт. Квартет ик марий мурым муралтен пуэн. Тыгак Алексей Алексеев «Сӱрем» чынилыш киножым ончыктен.

17 шагат гыч кокымшо пачашыште Одо Станислав Антиповын сӱрет ончержым почыныт. Туштак тӱрлӧ лив коллектив-влак шке мастарлыкыштым ончыктеныт.

Кастеным кумшо пачашыште концерт, куштымаш-мурымаш кас эртен. Тушто Риге гыч «Skandinieki» лив, Таллинн гыч «Кильене» эрзя «Hõpõhõim» сето, Тарту гыч «Röntyskä» ингерманланд, «Юмшан гур» одо да «Марий кумыл» ансамбль-влак выступатленыт. Тыгак ансамль еҥ-влак шке калык куштымашыштым да модмашыштым ончыктеныт да кумылан-влакым кушташ-модаш туныктеныт.

Эрлашыжым Риге олаште Эстоний да эстон-влак дене кылдалтше вер-влакыш автобус дене ончен савырнаш йӧн лийын. Вара кажне шке шонымыж семын Ригын Тошто олажым ончен коштын кертын. Кумылан-влак кевытлаш але музейлаш каеныт. Ныл шагатлан автобус мӧҥгешла Тартуш тарванен.

Эстоний гыч финн-угор-влаклан пайремыш миен толаш Фенно-Угрийлан оксам Родо-тукым программе ойырен.

Фотосӱретым кугемдашлан темдал: