Уло мо марий калыкын ончыкылыкшо Эстонийыште?

Этноярмиҥга деч вара шонкалымаш

Etnolaat_01Таллинныште 20-21 сентябрьыште Этноярмиҥга эртыш. Тушто кок марий организацият ыле. Мероприятий деч вара изиш шӱлыкан кумыл кодо.

Тыгай ярмиҥга Эстонийын рӱдолаштыже кажне ий эрта. Марий-влак шкеныштым тушто ӱмаште веле ончыкташ тӱҥалыныт. Тидлан негызым Тарту марий-влак ӱмаште пыштен манам гынат, йоҥылыш ом лий чай.

Теният Тарту марий-влак, Таллинн марий-влакым пырля ушен, тыгай кӱлешан мероприятийыш лектыч. Ярмиҥгаште кок кечым шогаш лиеш, кажне ушемлан авыртышан посна ӱстелым пуат. Ӱмаште чыла яра ыле, тений ик ӱстеллан ик кечыште 10 евром тӱлаш каласеныт. Эстонийысе кок марий организаций — Тарту Марий-влак Ушем да Таллинысе Марий Ушем — ярмиҥгаште пырля ик кечым, рушарнян 21 сентябрьыште, лийынна.

Тушто ӱстелым 10 шагатлан шарыман да 18 шагат марте шогаш кӱлеш. Садлан ончыч таллинн-влаклан толаш логалын, Тарту гыч ме иктаж 11 шагатлан толын шуынна.

Тарту марий чолгаеҥ-влак Татьяна Албахтина черле гынат, Светлана Акелдина ден Надежда Сидоркина паша деч вара,ончылгоч, йӱд марте кум тӱрлӧ подкогыльым ыштен толашеныт. Света эрденым эрак кынелын эше Таллинышкат толын кертын. Таллинн марий ушемын озаватыже Людмила Ямурзина олма когыльым да перемечым кӱэшт конден.

Эстонийыште илыше марий сӱретче Жанна Тохт шке сӱретышт-влакым ярмиҥгаш шке кӱкшытеш ончыкташ конден. Мемнам, Тарту марий да одо-влакым, ярмиҥгаш кондаш манын Эстонийысе изи-калык-влак ассоциаций посна автобусым колтен.

Ярмиҥга Таллиннын рӱыверыштыже, Ратуша кумыдкышто (площадьыште), эрта. Ты жапынак кок кечын тӱрлӧ калык-влакын эше концертышт лиеш. Тений мыланна кок марий организацийлан пырля пел шагатым пуэныт ыле.

Ончыч Тарту марий-влаклан выступатлаш логале. Чаманен каласыман, тений Тарту марий-влак ушемын «Марий кумыл» ансамбль гыч кок еҥ веле, шке калыкшым пагален, шочмо марий культурыжым ончыкташ тыршен — Анна Мишина ден Инга Погонина. Молыштын «жапышт уке», «мурен огыт мошто», «адаптироватлалтыт», «пашам ыштыман»…

Эше Тарту марий-влаклан марла кутырышо эстон Йӱрген Денго полшен, кӱчык жапыште марий сем-влакым кертмыж семын, мыняре кертын, тунаре тунем шуктен, шокташ тыршен.

Таллинн марий-влак лӱм дене Алексей Алексеев ден Гульнара Сергеева «Чыве вӱта гыч» куштымашым ончыктышт. Пеш сайын моторын шындыме, таклан огыл, нуно коктынат шке жапыштыже артистлан тунем лектыныт да марий театрлаште пашам ыштеныт.

Вара Виталий Рыбаков шке йочаж дене 2 марий номерым ончыктышт, А.Алексеев шкетынат муралтен пуыш.

Таллинныште тынаре шуко марий, но этноярмиҥгаште мӱшкыран Л.Ямурзиналан кече мучко шогаш логале. Кушто моло марийже? Южо марий толын пайремлен, ончен, сырам йӱын кошто…

Чыла сай манашат лиеш ыле. Ме вет марий-влак шылтален ойлымым огына йӧрате, эре шкеннам айват могыр гыч гына ужнена. Но Таллинныште марла кутырышо йоча уке манаш лиеш… але мый колын омыл.

Ала-молан мемнан, марий-влакын, чӱчкыдын марийлыкна тӱжвал тӱсыштӧ, «марий улам» манмыште, шкенан мер илыш чолгалыкыште веле. Ме кино-влакым войзена (сниматлена), кокалан марла куштена-мурена, марий организаций-влакыште мер паша дене шогылтына, но шке ешыштына йочана-влак дене марла огына кутыро.

Но вет марий калыкнан ончыкылыкшо мемнан «показухышто» огыл, а мемнан ешыште. Эн ончыч мемнан йочанан чынжымак марий улмаште. Йочана дене марла кутырена, марий шӱлышыштӧ ончен куштена гын, веле марий калыкна аралат кодеш!

Уло мо марий калыкын онылыкшо Эстонийыште? Ала…

Пайрем гыч видео:

Фото-влак (кугемдашлан темдал):

Васли Николаев,
Тарту Марий-влак Ушемым вуйлатыше

10 комментариев

Filed under Uncategorized

10 responses to “Уло мо марий калыкын ончыкылыкшо Эстонийыште?

  1. Аноним

    Лийже МАРИ калыкын ончыкылыкшо Эстонийыштат, чумыр Ош Туняштат!

  2. Чолгаеҥ

    Лач «лийже» манме гына дене шке семынже нимат ок лий… Чаманен каласыман, кызыт шуко вере, Эстонийыште гына огыл, марий-влак шке йочашт дене марла огыт кутыро. Тиде вет пеш неле, йӧсӧ паша, а ме марий-влак куштылго корным ойырен налынна. Вот те, вуеш ида нал, марлажат марий йӱкпале (буква) деч посна возеда… А вет тыште нимо йӧсыжат уке, изишак шымлыман, рашемдыман да изи программым шке компыш шупшыл налын шындыман… А Тендан тидым ышташ жапда уке, тыгак кузе марий ача-ава-влакын йочаштым марла туныкташ «жапышт уке»…

  3. Вачис

    Если мый Российский Федерацийыште ом иле гын, если тыште мемнан марий республике ок лий гын, тугак ыштем иле)))

  4. Аноним

    Зато сырам Европыште гай йуын моштат.

    • Чолгаеҥ

      Чынжымак Европышто гай изиш кумылым нӧлталаш веле йӱыт, тидыже эстон марий-влакын уло. Ала-мыняр гана туш коштынам ужынам, нигунам эстон марий-влак Россиыште гай сӧсна гай йӱын шынден ни кредыл, ни вурседыл огыт кошт. Вот эше шке шочмо марий калыкыштымат чынжымак шке ешыштышт пагалаш тунемыт да марла ойлышо, марий кумылан йоча-влакым ончен куштат гын, нуно пример шотеш лийын кертыт ыле…

  5. Вачис

    Интересне, Эстон калык марий калыкын или шке калыкшын ончыклыкшо нерген тушто мом шона?

    • Аноним

      Эстон марий-влакын КПД кӱшнырак…

      • nutri

        Эстон марий влак шукыжым на показуху да вид на жительстволан создают обществым, кроме писанины ничего уке.

  6. Васли Николаев

    Илашлан видым мер ушем (общественный организаций) гоч ышташ ок лий. Але марте кок пытартыш ий мемнан шке пӧлемна олан рӱдыштыжӧ Литератур пӧртыштӧ лийын. Арняш ик гана рушарня школ (2 урок марий йылме 2 урок музык да культур) эртен шоген. Ансамбль тений Тарту изи калык-влак фестивальыште, Таллинныште ярмиҥгаште, Ригыште выступатлен, фестиваль да ярмиҥгалан эше марий кочкышым ыштенна. Ик марий книгам — муро погым лукташлан оксам муынна да молат ышталтын. Мутат уке, эре шукырак ышташ лиеш.

  7. Уведомление: Тарту марий-влак эртыше ийым марла иктешленыт | MariUver

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google+ photo

Для комментария используется ваша учётная запись Google+. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

w

Connecting to %s