«Марий Эл Радион» концертышкыже пурымо годым колашат лиеш

Сӱрем тылзын 28 кечынжын Марий Эл радион концертше лиеш манын возенна ыле. Концерт эртымеке тӱрлӧ шонымашым колаш да окаш логале. Эртарыше-влак лач сайым гына ужыт гын, ик ончышо «Кугарняште» концертыш пурымо годым тӱнчыгашат лиеш ыле ман сера.

Марий Эл радион кеҥежым стадионышто эртарыме концертышкыже чӱчкыдын коштам. Моло годым варарак мийымылан кӧра эре сцене деч тораште шинченам, садлан нимом шот дене ужын омыл. Тений ондакрак каяш да ончылнырак верым налаш шонен пыштышым.

Телевидений да радио дене концерт 18 шагатлан тӱҥалеш манын увертарышт, садлан 16 шагат эрталтен, омса-влак воктеке калык погынаш тӱҥале. Ласканрак пураш шоналтышна, адакшым стадион кудывечыште гармонь почеш куштымашымат шот дене ончаш ок лий. Куштышо-влак йыр иктаж витле наре еҥ погынен шогалын, а молыштлан нимат ок кой. Садлан омса воктекак ошкылна.

Но ала-молан дыр 17 шагатат пелылан веле пурташ тӱҥальыч. Ме шӱжарем дене омса воктенрак шогена. Ончылнына — иктаж 100 еҥ, а шеҥгелне – 1000 наре. Теве омсам почыч да калык ончыко ЦУНАМИ гай лупшалте. А ончылно омсам кугун почын огытыл, лач ик еҥ шыҥышаш гай рож гыч веле пуртат. Ончык каяш ок лий, а шеҥгелне уло вий дене шӱкат. Тыге чыгынен шогална. Мый колем дыр манын лӱдын колтышым. Ны шӱлаш ок лий, ны кычкыраш. Шеҥгеке «Ида шӱкӧ» манын кычкыраш толашена, но мардеж гай ончык тарваныше тӱшка мемнам колеш мо? Изиш куштылгырак лийже манын, шеҥгекыла шӱкалаш тӧчена. Но вий уке, теве шӱлыш лектын кая, шонет. Воктенем шогышо ала-мыняр ӱдырамаш лӱдмышт дене шорташ тӱҥальыч (мый тыгайым илышыштем ик ганат ужын омыл ыле). Шеҥгекыла шӱкаш толашыше еҥ иктыжын пагаржым кынервуйжо дене чотак ишен шынден, весын очкиже пудыргыш. Йӧра эше яндаже шинчашкыже ыш логал. Чот шучко ыле.

Ончылнемак самырыкрак пӧръеҥ кум ияш йоча дене шогыш. Пураш куштылгырак лийже манын, тудо йочажым шӱйышкыжӧ шынден. Очыни, ондакрак верым налын, концертым шинчын ончаш шонен, вет икшыве дене кум шагат йол ӱмбалне шогаш неле. Шӱкаш тӱҥалмекышт, йоча, шеҥгекыла пӧрдын-пӧрдын, ачаж шӱй гыч камвозо. Йӧра, ала-кӧн кидышкыже логале. А мландыш камвозеш гын! Раш: тудым тошкен пуштыт ыле, вет иктат чарнен ок шогал, иктат кычкырымым ок кол, йол йымалныже мо улмым ок уж. Ачажат икшывыжым лап лийын налын ок керт ыле, молан манаш гын килька гай шыҥ лийын, да шеҥгечын толкын мемнам ончыко уло вий дене шӱкен. Мыйынат моло семынак стресс тӱҥале: кидем, йолем чытырат. Стадион кӧргыш пурымекат, иктаж вич минут наре лыпланен кертын омыл, шинчавӱд шкеак йоген. А ончычем пурышо ӱдырамаш, ӧрдыжкырак шогалын, пире гай урмыж шорто. Тудын тыгай чот кугу стресс лийын. Шоналтем да кызытат чонемлан нелын чучеш.

Мом каласынем: тыге пурымо годым иктаж-кӧ иктаж-мо лиеш гын, кӧ мутым кучаш тӱҥалеш? Ала-кӧлан чотак логалеш вет. Адакшым умбакыже марий концертым эртараш чарен кертыт. Садлан лучо ондакрак пурташ тӱҥалаш кӱлеш, шонем. Ласкан, йытыран, эркын.

Программе шотышто ик тыланымаш веле: мыйын шонымаште, шагалрак кутыраш да шукырак мурызым колташ кӱлеш. Вет ме эн ондак концертым ончаш толынна. Сценарий уда огыл ыле, но тудым иктаж тӱвыра полатыште ончаш сай, кунам кечмогай лук гычат чыла коеш. А тыште, вӱдышӧ-влакын ойлымыштла, «Камчаткыште» шинчыше-влак нимом ышт уж (таблоштат чурий сайын ок кой, тора гыч сниматлен ончыктат), а муро почеш кеч кушталташ лиеш. Темлем: вес гана Марий Эл радион иктаж пашаеҥже тек шке тыге шеҥын пура да, тора «Камчаткыш» шинчын, концертым онча. Вара мом шонымыжым каласа. Шке ужде, иктешлымашым ышташ да йоҥылышым тӧрлаш нелырак.

Тек тиде концертын ӱмыржӧ кужу лиеш, да тудо мыланна куаным гына конда, воза ИРИНА Я. «Кугарня» газетыште.

Марий Эл ТВ-н «Семалан» передачыже Марий Эл радиошто да тудын концертлаштыже лач сайым гына ужеш да радио пашаеҥ-влакым моктен ончыкта:

Сергей Карпов YouTube-ште концерт кечын ыштыме кок видеом темла. Калык концертыш погына:

Сергей Якаев и Михаил Веселов шоктат да мурат:

MariUver

1 комментарий

Filed under Артикль-влак, Видео, Музык

One response to “«Марий Эл Радион» концертышкыже пурымо годым колашат лиеш

  1. Аликсендер

    Если не живёшь в Марий Эл, исходя из мариязычных блогов, сайтов, создаётся впечатление, что РМЭ — исключительно концертно -фестивальная. Все как бы пляшут и поют: жизнь такая…. И хотя Партия Жириновского не является правящей, однако именно её воспитаннику, главе Республики, благодарить надобно за то, что
    все пляшут и поют. Потому как живётся мари обрядово-радостно,
    исключительно празднично !
    Другие-то темы… чреваты… вдруг не так, как надо поймут.

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google+ photo

Для комментария используется ваша учётная запись Google+. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s