Марий тӱвыра рӱдерын ончыкылыкшо раш огыл

«Марий дискотекыште тыгай чон кумыл озалана… Тыште айдемын кажне клеткыже кушта…» — тыгай ой йоҥгалте ӱмаште «Россий радион» эфирыштыже, Маргарита Лянген передачыштыже. Тыгай шӱлыш ынде ятыр ий Йошкар-Оласе Дим.Орай лӱмеш уремыште верланыше «Автодор» клубыштат озалана. Тыште Марий тӱвыра рӱдер верланен. Тудын пашаеҥже-влак икшыве-влаклан марий пайремым, идалык мучко толын шогышо калык йӱлам ончыктышо программым, «Марий касым», Марий дискотекым эртарат. Садланак рӱдер ятыр марий айдемылан чоным лывыртыме, муро-куштымаш гоч марий улмым шижме верыш савырнен.

Пытартыш жапыште калыкыште Марий культур рӱдерым петырыме, вес верыш кусарыме нерген мут шокта. Тидын нерген ме рӱдерын вуйлатышыже Валерий Григорьев да Марий Эл тӱвыра, печать да калык-влакын пашашт шотышто министрын алмаштышыже Галина Ширяева дене мутым вашталтышна.

Марий тӱвыра рӱдерым вуйлатыше В.Григорьев:

— Ме «Автодор» культур пӧртыштӧ 2002 ий гычак пӧлем-влакым айлен иленна. Калык дене вашлийме тӱвыра пашамат тысе залыште, фойеште эртаренна. Марий кожпайрем, йӱла кас, бард-влакын клубышт, самырык-влаклан драме кружок, Марий дискотеке, «Марий кас» – чылажат тыште, «Автодор» клубышто, эртаралтын. Йошкар-Оласе калык дене пырля районла гычат калыкым вашлийынна. Медведево, Морко, Советский, У Торъял, Шернур кундемласе ял калык чӱчкыдынак мемнан дене уна лийын. Мый шонем, пытартыш ийлаште, тыге мурен-куштен, марий шӱлышым ятыр еҥын чоныштыжо ылыжтыме. Поснак самырык тукым дене пашам ворандарымашке кугу вийым пыштенна. Вӱргече еда эртарыме Марий дискотека шукыштлан келша. Эсогыл мемнан касыште палыме лийын, ешым чумырышо-влак улыт. Тыште пашаланаш мыланна чыла йӧн лийын.

Кодшо ий мучаште «Автодор» тӱвыра пӧртыштӧ ачалыме пашам тӱҥалыныт. Садлан ӱярня тылзе гыч Марий культур рӱдер чыла мероприятийым эртарыме верым вашталта. Офисна тышанак кодеш, а калык дене ме Ленин лӱмеш тӱвыра полатыште вашлияш тӱҥалына. Туштак «Марий кас», Марий дискотеке эрташ тӱҥалыт. Марий дискотеке кажне вӱргечын 19.00 шагатлан, Марий кас шуматкече еда 15.00 шагатлан тӱҥалеш. Ме ӱшанена: верым вашталтымылан кӧра еҥ-влакын кумылышт ок воло да нуно, ондаксылак мемнан деке толын, марий кумылыштым ончыктат.

Марий Эл тӱвыра, печать да калык-влакын пашашт шотышто министрын алмаштышыже Г.Ширяева:

— Йошкар-Олаште кум тӱрлӧ калык культур рӱдер пашам ышта: Гагарин уремысе Мер-политика пӧртыштӧ Руш тӱвыра рӱдер верланен, «Колос» культур пӧртыштӧ — Татар рӱдер. Марий тӱвыра рӱдер — «Автодорышто». Кум рӱдерланат пашадарым тӱлаш оксам да пӧлемым айлыме роскот кугыжаныш бюджет гыч ойыралтеш. Руш культур рӱдер кугу мероприятий годым залым але куштымо верым арендоватла. «Колосышто» эртыше ийлаште гына ачалыме пашам шуктеныт, теният тиде паша шуйна. Марий тӱвыра рӱдерат «Автодор» клубышто ятыр жап сай да кӱлешан пашам шуктен. Кызыт тушто у оза — «Марий Эл Дорстрой» ОАО. Тыште коло ий наре ачалыме паша лийын огыл. Тений ты пашалан пижыныт. Ачалыме жапыште, тиде, очыни, шыже марте тыге лиеш, Марий культур рӱдерын ятыр мероприятийжым Ленин лӱмеш тӱвыра полатыште эртараш кутырен келшыме.

Ончыкылык нерген ойлаш гын, ачалыме деч вара ончалына: могайрак йӧн лиеш. Келша гын, тыштак марий-влак чумыргаш тӱҥалыт. Ок келше гын, вес верым муаш лиеш. Эше утларак умбаке ончалаш гын, Марий Эл Тӱвыра, печать да калык-влакын пашашт шотышто министерстве Правительствын йодмыж почеш Йошкар-Олаште «Келшымаш пӧртым» чоҥымо нерген кагаз-влакым ямдылен. Тыгай ӱшан дене илена.

 Зоя Глушкова

Налмывер: «Марий Эл» газет

Фотом Марий тӱвыра рӱдерын сайтше гыч налме