Маргарита Медикова сылнымут касым ямдылен (ВИДЕО)

13 январьыште Марий Элын калык, Россий Федерацийын сулло артисткыже Маргарита Медикова М.Шкетан лӱмеш Марий калыкле драме театрын изи залыштыже «Шарнен, огына лий ойган…» сылнымут касым эртарен.

Сылнымутым лудшылан пӧлеклыше-влак кокла гыч Маргарита Егоровна — ик эн устан пашам ыштыше актриса. Тудын чон кӧргыштыжӧ А.Пушкинын, С.Есенинын, М.Цветаеван, А.Ахматован почеламут аршашышт илат.

Марий серызе-влакын возымышт дене тудо поснак кугу пашам ышта. В.Абукаевын, Ю.Артамоновын, З.Каткован, Г.Алексеевын, В.Бердинскийын, М.Илибаеван прозыштым Марий радион эфирже гоч йоҥгалтара. В.Бояринован, З.Ермакован, А.Иванован, С.Эсаулован почеламутлаштым ынде коло ий наре телеэкраныште да театрысе концертлаште лудеш. «Марий Эл» ГТРК-н сылнымут редакторжо Любовь Борисова дене кылым кучымыжо тӱвыргӧ саскам шочыктен: коло наре видеоклип войзалтын.

Ты гана Маргарита Медикова актёр йолташыже, палымыже-влакым ӱжын. Тудо Зоя Дудинан, Валентина Изилянован 32 почеламутышт негызеш композицийым ямдылен. Шонымашым вияҥден толшо сылнымут радам, ик аршашыш чумырген, моноспектакль семын йоҥгалте.

Шочмо калыкын пӱрымашыже, ончыкылыкшо нерген тургыжланыме, икшыве, еш, пелаш нерген азапланыме кумыл, юмыйӱла, ото, марий тӱняумылымаш нерген шонкалымаш актрисын чонжо гыч кышкалалт лекме семынак йоҥгалте. Зоя Дудинан «Тумо», «Аралтыш», «Нылле ик порылык», «Арам те вурсышда теҥгече», В.Изилянован «Мый тылат нимомат ом каласе…», «Уке улам…», «Тӱня мучашдыме гынат…», «Пеледышын колымыжо» да моло почеламут колыштшылан у шонымашым, шижмашым пӧлеклышт.

Сценым сылнештараш йошкар, шем, ош тӱсым кучылтмо. Кугезына-влакын, тачысе марий-влакын Сандалык, Юмо, ар нерген умылымашыштым шыҥдарыше тистын тӱсшым устан кучылтмо дене актриса курымла дене вияҥ да аралалт толшо чон поянлыкнам ончыктыш. Семым, тул волгыдым устан кучылтмымат палемдыман. Ты пашам С.Таныгин, Н.Копцева, И.Савельева, А.Семёнова шуктеныт.

— Кунам почеламутым книгаште лудат — тиде ик умылымаш, кунам авторым колыштат — вес ончалтыш, а кунам драме актриса, чонжо вошт колтен, сылнымут корно дене йӱлен ила — тиде йӧршеш у
шижмаш, умылымаш, — каласыш премьера деч вара М.Шкетан лӱмеш театрыште сылнымут ужашым вуйлатыше В.Семёнов.

— Тачысе вашлиймаште мый ятыр ий почеламут дене ыштыме пашамым ончыктенам. Театрлан, театрыш коштшо калыклан тиде кӱлеш манын ӱшаныме шуэш. Эре мурен-куштен гына илышын шындыме йодышыжлан вашмутым муаш йӧсӧ. Ты шотышто сылнымут — сай полыш, — каласыш премьера деч вара Маргарита Медикова.

Ушештарена: М.Шкетан лӱмеш Марий калыкле драме театрын изи залыштыже 70 вер уло. Тышке мер калык, йолташда, пашаче еш але тунемше-влак тӱшка дене пырля погынен толын, жапым пайдалын эртарен кертыда. Тендан йыҥгыртымыдам (+7-8362) 451 604 номеран телефон дене вучат.

Зоя ГЛУШКОВА

Текст: «Марий Эл» газет

Видео: video.vmariel.ru

Оставьте комментарий

Filed under Артикль-влак, Видео

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google+ photo

Для комментария используется ваша учётная запись Google+. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s