Татар да Одо кундемысе марий говор-влак мутер лектын

Йылмым, сылнымутым да историйым шанчын шымлыше Валериан Васильев лӱмеш Марий институт 2012 ий тӱҥалтыште икмыняр книгам савыктен луктын.

Нунын кокла гыч иктыже — йылме пӧлкан пашаеҥже Валерий Иванович Вершининын «Татарстан ден Удмуртийысе марий кутыртыш-влак мутерже». Вуймутак ойла: мутерышке Татарстан ден Удмуртийыште илыше марий-влакын йылмыштышт кучылталтше мут-влакым чумырымо.

792 лышташан книгаште 5 тӱжем утла мутер статья уло, ятырже икмыняр икгай вожан шомакым уша. Тышке чумыр марий калыклан палыме мутвлакымат да, мо эн шергыже, верысе марий-влакын йылмыштышт гына кучылталтшымат пуртымо.

Чыла гаяк шомакым, нунын значенийыштым да кучылталтмыштым муткылдыш але предложений дене пеҥгыдемден кодымо. Тӱҥ шомак ден иллюстрацийым (ӱшандарыше пример-влакым) руш йылмышке кусарыме. Кӱлешлан шотлымо семын шомак-влакын кушеч лиймыштым ончыктымо.

Авторын ончылмутышто палемдымыж дене келшыде ок лий, ты мутерым Татарстан ден Удмуртийысе, Виче да Вичумбал кундемысе марий-влакын илыш энциклопедийыштлан шотлаш лиеш. Раш, тыгай мутер шуко еҥлан, тӱрлӧ вере ыштышылан — шанчызе, возгалыше, туныктышо, студент, тунемше да тулеч молыланат — пайдале лиеш. Адакшым тудо татар, удмурт, родо финн-угор йылме-влакым лончылышылан, йылме-влак кокласе кылым нергелышылан кугу полыш.

Серафима СИБАТРОВА

Налмывер: «Марий Эл» газет