Мемнам тыге мыскылат

Россий Кугыжаныш Думыш сайлымаш кече утыр лишемеш. Тидыжым кажне еҥ шижеш да партий-влакын таҥасымыштым ме шке шинчана денак ужына. Марий Элыштат партий-влак икте-весышт дене пеш чот ӱчашат: газет, радио, тедевидений эфир гоч шке программыштым моктат. Депутат верым налмекышт, мом ышташ тӱҥалыт – огына пале, но сӧрат, сӧрат, сӧрат…

Йошкар-Оланан уремлаж дене эртет да тыштат туштат тӱрлӧ чия дене возымо ӱжмаш-влак шинчам йымыктарат. Чылаштыжат – Кугу Сайлымашке мияш ӱжмаш. Рӱдӧ оланан Ленинский проспектше дене эртышемла, троллейбус окна гыч «растяжке» манме плакатым куанен лудам да мыняр оксам арам кышкат манын пеш вурсем.

Но теве «Марий Гимназий» манме 14-ше школ деке лишемшемла, вуйым нӧлтальымат, марла возымым лудам. Семынемже куаненам: мемнан марий йылмынам кугыжаныш йылмылан шотлатак улмаш, шонем. Но мо тыгай: «4 декабрьыште депутатше-влакым сайлымаш Россий Кугыжаныш Думын»?

Уэш да уэш шымленрак лудаш манын, черетан остановкеш волен кодым да фотосӱретымат ыштышым. Теве ынде теат лудын ончыза: мом тушто да могай йылме дене возымо. Школышто мемнам тыге возаш туныктат ыле: «2011 ий 4 декабрьыште Россий Кугыжаныш Думын депутатше-влакым сайлымаш».

Йыҥгырташ шонышым республикынан Рӱдӧ избирательный комиссийышкыже, но колынам: тушто марий йылмым палышыже иктат уке. Ом умыло: марий журналист, туныктышо, артист, ученый да мер пашаеҥ-влак тыштыла огыт кошт мо? Коштыт гын, ужыт гын, лудыт гын, ала умылтарат ыле: кунамсек тыге мыскылаш тӱҥалыныт мотор марий йылмынам? Кӧ да кӧлан тыгай правам пуэн? Тыге игылтмым да мыскылымым мыняр чыташ лиеш? Кӧ тидлан вашештен кертеш? Ала Марий национальный конгресс, ала «Саскавий», ала «Ош Виче»? Нуно огыл гын, «Мер Каҥашлан» Юмак пӱрен марий йылмынан аруклыкшо верч тавадаҥ шогаш.

А.Смирнов

М.Масловын фотожо