Эртыше кугарнян «Автодор» культур полатыште Марий тӱвыра рӱдер «Ешыштем поро йӱла» фестиваль эртарыш. Тышке эн уста, эн чолга марий еш-влак погыненыт.
Кок ийлан ик гана марий еш-влак, шке мастарлыкшым шуарыме семын, фестивальышке толыт. Марий еш йӱлам ончыктат, марий кочкыш дене сийлат да кид-мастарлык дене ӧрыктарат.
Погынышо еш-влак дене палыме лияш Кугыжаныш Думын депутатше, Мер каҥашын вуйлатышыже Лариса Яковлева, Кугыжаныш Погын вуйлатышын алмаштышыже Анатолий Иванов да Марий Эл Республикын тӱвыра, печать да калык-влакын пашашт шотышто министрын алмаштышыже Галина Ширяева толыныт.
Конкурсыш 8 еш ушнен. Нуно шке ешыштым тӱрлӧ йӧным кучылтын: видеоматериал гоч, мурен-куштымаш гоч ончыктеныт. Жюрин иктешлымыже почеш икымше верым Морко район гыч Александровмыт еш налын, кокымшо верым Килемар район гыч Артемьевмыт еш, кумшо верым Соломинмыт еш.
Йӧратыме кочкыш номинацийыште Звенигово район гыч «Ӱшанлык» Буденко еш ончыко лектын, а «эн уста еш» номинацийыште Шернур гыч Пиваршев еш ойыртемалтын, еш йӱлам эн сай Рыбаковмыт еш тӱрыс ончыктен, а кид-мастарлык номинацийыште Кужэҥер район гыч Каменщиковмытын ешыже эн тале лийын.
Марий тӱвыра рӱдер
MariUver 